Childhood obesity | ఆన్‌లైన్‌ క్లాసులతో లావెక్కుతున్న చిన్నారులు

కరోనాకు పూర్వం 10నుంచి 13శాతం పిల్లల్లో ఊబకాయ సమస్య ఉండేది. కరోనా తరువాత ఈ సమస్య మరింత పెరిగింది. కొవిడ్‌ పరిస్థితుల కారణంగా గడిచిన యేడాదిన్నర కాలంలో ఊబకాయ సమస్య 13నుంచి 16శాతానికి చేరింది. అంటే దాదాపు సుమారు మూడు శాతం పెరిగినట్లు ఆరోగ్య సర్వేల ద్వారా తెలుస్తున్నది.

శ్రమ తగ్గింది.. విశ్రాంతి పెరిగింది

పిల్లల్లో ఊబకాయ సమస్య అనేది ఈ మధ్యకాలంలో పెరుగుతున్నది. కరోనాకు పూర్వం కంటే కరోనా తరువాత ఈ సమస్య మరింత పెరిగింది. దీనికి ప్రధాన కారణం స్కూల్స్‌ షట్‌డౌన్‌ కావడం. పాఠశాలలు మూసి ఉంచడం వల్ల పిల్లల్లో ఫిజికల్‌ యాక్టివిటీస్‌ పూర్తిగా తగ్గిపోయింది. ఆన్‌లైన్‌ క్లాస్‌లతో గంటల తరబడి ఒకే చోట కూర్చోవాల్సి వచ్చింది. తల్లిదండ్రులు సైతం వర్క్‌ఫ్రమ్‌ హోమ్‌తో ఇండ్లకే పరిమితమయ్యారు. కరోనా భయంతో పిల్లలను భయటకు తీసుకెళ్లి ఆడిపించే పరిస్థితి లేకుండా పోయింది. ఫలితంగా ఒబేసిటికీ దారితీస్తున్నాయి. తల్లిదండ్రులు సైతం పిల్లలకు సమయపాలన లేకుండా ఎప్పుడు పడితే అప్పుడు ఆహారం ఇవ్వడం, ఎక్కువసార్లు స్నాక్స్‌ వంటివి ఇవ్వడం కూడా ఒక కారణంగా చెప్పవచ్చు. ఒబేసిటీని సకాలంలో నియంత్రించకపోతే కౌమార దశకు చేరుకునే సరికి బీపీ వంటి దీర్ఘకాలిక వ్యాధులు వచ్చే అవకాశం ఉంది. బాలికల్లో అయితే సెలసరి, ఫెర్టిలిటీ తదితర సమస్యలు ఎదురయ్యే అవకాశాలున్నాయి.

ప్రధాన కారణాలు

• ఆహారపు అలవాట్లు
• హై కాలరీస్‌గల ఫుడ్‌ తీసుకోవడం.
• శారీరక శ్రమ లేకపోవడం.
• ఎక్కువగా జంక్‌ ఫుడ్‌.
• తీసుకోవడం(పిజ్జా, బర్గర్లు, ఫాస్ట్‌ఫుడ్‌).
• భౌతిక ఆటలు కాకుండా డిజిటల్‌ ఆటలకు అంకితమవ్వడం.
• ఎర్లీ హైపర్‌టెన్షన్‌ అంటే బీపీ వస్తుంది.
• ఆయాసం లేదా ఉబ్బసం వస్తుంది.
• కొలెస్ట్రాల్‌ పెరిగిపోతుంది.

ఆహార నియమాలు పాటించాలి

ఆహార నియమాలు కచ్చితంగా పాటించాలి. ఫాస్ట్‌ఫుడ్‌లు, బర్గర్లు, వేపుడ్లు, బేకరీ ఫుడ్స్‌, మాంసహారం తదితర ఆహారానికి దూరంగా ఉండాలి. ఒకవేళ పిల్లలపై కఠిన ఆంక్షలు పెట్టకుండా అకేషనల్‌గా ఇవ్వొచ్చు. అయితే జంక్‌ ఫుడ్‌ తిన్న తరువాత దానికి తగిన ఫిజికల్‌ యాక్టివిటీ చేయించాలి. ఎక్కువశాతం సంప్రదాయక ఆహార పదార్థాలనే పిల్లలకు అలవాటు చేయడం ఉత్తమం. ఎక్కువగా పండ్లు, పండ్ల రసాలు, ఆకు కూరలు, శాఖాహారం ఇవ్వడం మంచిది.

తల్లిదండ్రులు రోల్‌ మోడల్‌గా మారాలి

సాధారణంగా పిల్లలు ఏదైనా చూసి నేర్చుకుంటారు. అంటే పెద్దవారు ఏది చేస్తే పిల్లలు అదే చేస్తారు. అందుకని తల్లిదండ్రులే పిల్లలకు రోల్‌ మోడల్‌గా మారాలి. ప్రతిరోజూ వ్యాయామం చేయడం, వాకింగ్‌, పిల్లలతో కలిసి ఆటలు ఆడడం చేయాలి. ఆహారం విషయంలోనూ తల్లిదండ్రులు నియమాలు పాటించాలి. పిల్లల ముందు గంటల తరబడి ఫోన్‌లలో చాటింగ్‌ చేయడం, యూట్యూబ్‌ చూడడం, డిజిటల్‌ గేమ్స్‌ ఆడటం
చేయకూడదు.