Hot Water | వాతావరణంతో సంబంధం లేకుండా వేడినీళ్లు తాగితే మంచిదేనా?

దప్పిక వేయగానే మంచినీళ్లు కావాలనిపిస్తుంది. ఎండకాలం అయితే ఫ్రిజ్‌లోంచో, కుండలోంచో తీసుకుంటాం. కానీ, చైనా సంప్రదాయం ప్రకారం వాతావరణంతో సంబంధం లేకుండా వేడినీళ్లు లేదా గోరువెచ్చటి నీళ్లను తాగడమే మంచిది.

Hot Water | దప్పిక వేయగానే మంచినీళ్లు కావాలనిపిస్తుంది. ఎండకాలం అయితే ఫ్రిజ్‌లోంచో, కుండలోంచో తీసుకుంటాం. కానీ, చైనా సంప్రదాయం ప్రకారం వాతావరణంతో సంబంధం లేకుండా వేడినీళ్లు లేదా గోరువెచ్చటి నీళ్లను తాగడమే మంచిది. చైనా వైద్యంలో ‘యిన్‌-యాంగ్‌’ అనే భావనలు ఉంటాయి.

యిన్‌ కిందికి వచ్చే చల్లని నీళ్లు తాగితే శరీర సమతౌల్యం దెబ్బతింటుంది. అందుకే, వేడినీళ్లు కానీ, గోరువెచ్చటి నీళ్లు కానీ ఎంచుకోవాలని అంటారు. తగిన మోతాదులో నీళ్లు తాగితే శరీరంలో తేమ ఉంటుందని తెలిసిందే. అదే వేడినీళ్లు తాగితే మరిన్ని ఆరోగ్య ప్రయోజనాలు దక్కుతాయి. అలాగని అతిగా తాగొద్దనీ హెచ్చరిస్తున్నారు.

• చలికి వణుకుపుడుతుంది. దీంతో శరీరం వెచ్చబడుతుంది. అదే వేడినీళ్లు తాగితే వణుకు తగ్గుతుంది. దీనివల్ల శరీర శక్తి ఎంతో ఆదా అవుతుంది.
• వేడినీళ్లు శరీర ఉష్ణోగ్రతను పెంచుతాయి. ఇది చెమటకు, మూత్రానికి కారణమవుతుంది. అలా శరీరంలో వ్యర్థాలు బయటికి వెళ్లడానికి దోహదం చేస్తుంది.
• జలుబు, దగ్గు బాధిస్తున్నప్పుడు వేడినీళ్లు ఉపశమనం కలిగిస్తాయి.
• వేడినీటి ఆవిరిని పీల్చడం ద్వారా సైనస్‌, అలర్జీలు, గొంతులో కఫం నుంచి కూడా ఉపశమనం లభిస్తుంది.
• వేడినీళ్లు చర్మకణాలను పునరుత్తేజితం చేస్తాయి. హానికరమైన ఫ్రీ రాడికల్స్‌ ముప్పును తగ్గిస్తాయి. వయసు మీదపడటాన్ని నివారిస్తాయి.
• తగినన్ని నీళ్లు తాగకపోతే కేంద్ర నాడీ మండల వ్యవస్థ మీద ప్రతికూల ప్రభావం పడుతుంది. కొత్త అధ్యయనాల ప్రకారం.. వేడినీళ్లు తాగితే మానసికంగా సంతృప్తి లభించిన అనుభూతి కలుగుతుందట.
• సాయంత్రం వేళలో వేడినీళ్లు తాగితే విశ్రాంతిగా ఉంటుందట. మానసిక ఒత్తిడి తగ్గి, శరీరం రాత్రి నిద్రకు సిద్ధమవుతుందని చెబుతారు.
• జీవాధారమైన నీటిని తగిన మోతాదులో తాగుతూనే ఉండాలి. వేడినీళ్లకు కొంచెం నిమ్మరసం, అల్లం చేర్చుకుంటే మరీ మంచిది. విటమిన్‌ సి ప్రయోజనాలు కూడా అందుతాయి.