Visit:
Heart Diseases | గుండె ఆరోగ్యం అంటే సన్నగా కనిపించే శరీరం, కండరాలు కనిపించడం, గంటల తరబడి వ్యాయామం చేయడం లేదా ఎలాంటి ఛాతి నొప్పి లేకపోవడం మాత్రమే కాదని గుండె వైద్య నిపుణులు తెలిపారు. బయటికి ఎంతో ఫిట్‌గా కనిపించే వ్యక్తుల్లోనూ గుండె సంబంధిత సమస్యలు ఉంటాయ‌ని వారు పేర్కొంటున్నారు. గుండెపోటు వచ్చిన తర్వాత వైద్యులను సంప్రదించే వారిలో సుమారు సగం మందికి గతంలో ఎలాంటి లక్షణాలు తెలియకుండానే సైలెంట్ హార్ట్ అటాక్ వచ్చి ఉంటుందని చెప్పారు. ముఖ్యంగా యువతలో శరీరాకృతిని మార్చుకోవడానికి ఆహార సప్లిమెంట్లు, హార్మోన్లు, ఇతర రసాయన పదార్థాలను ఉపయోగించడం ఆందోళనకరంగా మారుతోందన్నారు. కృత్రిమంగా కండరాలను పెంచేందుకు ఇలాంటి పదార్థాలను ఉపయోగించడం గుండెపోటు, మెదడు సంబంధిత సమస్యల ప్రమాదాన్ని పెంచుతుంద‌ని హెచ్చరించారు. అలాగే ఒత్తిడి, సరైన జీవనశైలి లేకపోవడం ఇప్పటికే గుండె ధమనుల్లో సమస్యలు ఉన్నవారిలో వ్యాధి తీవ్రతను పెంచుతుంద‌ని తెలిపారు.
భారతీయుల ఆహారపు అలవాట్లు, ముఖ్యంగా అధికంగా పిండి పదార్థాలు తీసుకోవడం కూడా గుండె ఆరోగ్యంపై ప్రభావం చూపుతున్నాయని వారు పేర్కొన్నారు. కార్బొహైడ్రేట్లు శరీరంలో గ్లూకోజ్‌గా మారుతాయని, ఉదాహరణకు ఒక గిన్నె అన్నం తిన్నప్పుడు అది శరీరంలో గణనీయమైన మొత్తంలో గ్లూకోజ్‌గా మారుతుందని వివరించారు. అయితే కార్బొహైడ్రేట్లను పూర్తిగా మానేయాలని కాదు, వాటి పరిమాణం, ఆహార సమతుల్యతపై దృష్టి పెట్టాలని సూచించారు. మధుమేహం కూడా దేశంలో గుండె ఆరోగ్యానికి పెద్ద సవాలుగా మారుతోందన్నారు. ఇతర దేశాలతో పోలిస్తే భారతీయులు తక్కువ వయసులోనే మధుమేహానికి గురయ్యే అవకాశం ఎక్కువగా ఉందని, గుండె శస్త్రచికిత్స చేయించుకునే రోగుల్లో దాదాపు సగం మందికి మధుమేహం ఉండడం పరిస్థితి తీవ్రతను సూచిస్తుందని చెప్పారు. ఒక్కసారి రక్తంలో చక్కెర పరీక్ష చేయించుకుని అంతా బాగుందని భావించకుండా, మూడు నెలల సగటు చక్కెర స్థాయిని తెలియజేసే హెచ్‌బీఏ1సీ పరీక్షపై కూడా దృష్టి పెట్టాలని సూచించారు.
గుండె జబ్బులను ముందుగానే గుర్తించడం ద్వారా వాటి ప్రభావాన్ని గణనీయంగా తగ్గించవచ్చని నిపుణులు తెలిపారు. దేశవ్యాప్తంగా ముఖ్యంగా రెండో, మూడో శ్రేణి నగరాల్లో అందరికీ అందుబాటులో ఉండే నిర్ధారణ కేంద్రాల వ్యవస్థను ఏర్పాటు చేయాల్సిన అవసరం ఉందన్నారు. సుమారు గంట సమయంలో గుండె జబ్బులు, క్యాన్సర్ వచ్చే అవకాశాలను గుర్తించగలిగే పరీక్షా కేంద్రాలు అందుబాటులో ఉంటే ప్రజలు వ్యాధిని తీవ్ర దశకు చేరకముందే గుర్తించి తగిన చర్యలు తీసుకునే అవకాశం ఉంటుందని చెప్పారు. మహిళల్లో కూడా రుతువిరతి తర్వాత గుండె జబ్బుల ప్రమాదం గణనీయంగా మారుతుందని తెలిపారు. చిన్న వయసులో మహిళలను రక్షించే హార్మోన్ల ప్రభావం రుతువిరతి తర్వాత తగ్గడంతో గుండెపోటు వచ్చే అవకాశం పురుషులతో పోలిస్తే దగ్గరయ్యే స్థాయికి పెరుగుతుంద‌ని వివరించారు. అందువల్ల వయసు, లింగం ఆధారంగా గుండె జబ్బుల ప్రమాదాన్ని తక్కువగా అంచనా వేయకూడదన్నారు.
కోవిడ్ టీకాలకు, ప్రస్తుతం కనిపిస్తున్న గుండె జబ్బుల పెరుగుదలకు ప్రధాన సంబంధం ఉందని చెప్పడానికి తమ‌కు ఆధారాలు కనిపించడం లేదని నిపుణులు తెలిపారు. తీవ్రమైన కోవిడ్ సమయంలో రక్తం గడ్డకట్టడం వల్ల గుండె, మెదడులో సమస్యలు ఏర్పడే అవకాశం ఉందని, అయితే టీకా తీసుకున్న చాలా కాలం తర్వాత ఇలాంటి సమస్యలు రావడానికి స్పష్టమైన సంబంధం ఉందని చెప్పలేమన్నారు. యువతలో గుండెపోటులు గతంతో పోలిస్తే భారీగా పెరిగాయా అనే విషయంలోనూ స్పష్టంగా చెప్పలేమని, అయితే సామాజిక మాధ్యమాలు, ఆధునిక వైద్య పరీక్షల కారణంగా అవగాహన మాత్రం పెరిగిందని పేర్కొన్నారు. శరీరం బయటికి ఫిట్‌గా కనిపించడం గుండె ఆరోగ్యానికి పూర్తి ప్రమాణం కాదని, మధుమేహం, రక్తపోటు, కొలెస్ట్రాల్, ధూమపానం, కుటుంబ చరిత్ర, జీవనశైలి వంటి ప్రమాద కారకాలపై దృష్టి పెట్టడం ముఖ్యమని సూచించారు. గుండెను ఆరోగ్యంగా ఉంచుకోవడంలో ముందస్తు గుర్తింపు, క్రమమైన ఆరోగ్య పరీక్షలు కీలకమని నిపుణులు స్పష్టం చేశారు.
