Visit:
Vitamin D Tablets | విటమిన్ డి శరీరానికి అవసరమైన ముఖ్యమైన పోషకాల్లో ఒకటి. ఎముకల ఆరోగ్యంతోపాటు గుండె, రక్తనాళాల పనితీరులోనూ ఇది కీలక పాత్ర పోషిస్తుంది. దీంతో చాలామంది వైద్యుల సలహాతో లేదా సొంతంగా విటమిన్ డి సప్లిమెంట్లను తీసుకుంటున్నారు. అయితే రక్తపోటు నియంత్రణ కోసం రోజూ మందులు వాడేవారు విటమిన్ డి సప్లిమెంట్లను తీసుకునే ముందు కొన్ని విషయాల్లో జాగ్రత్తగా ఉండాలి. ముఖ్యంగా కొన్ని రకాల రక్తపోటు మందులతో అధిక మోతాదులో విటమిన్ డి తీసుకోవడం వల్ల సమస్యలు తలెత్తే అవకాశం ఉంటుంది. విటమిన్ డి శరీరంలోని రక్తనాళాల పనితీరు, రక్తనాళాల గోడల సడలింపు, రక్తపోటును నియంత్రించే రెనిన్-యాంజియోటెన్సిన్-ఆల్డోస్టెరాన్ వ్యవస్థపై ప్రభావం చూపుతుంది. శరీరంలో విటమిన్ డి తగిన స్థాయిలో ఉండడం వల్ల రక్తనాళాలు సడలేందుకు, రక్తనాళాల పనితీరు మెరుగుపడేందుకు, వాటి దృఢత్వం తగ్గేందుకు సహాయపడుతుంది. విటమిన్ డి లోపం ఉన్నవారిలో దాన్ని సరిచేయడం వల్ల రక్తపోటు నియంత్రణకు కూడా కొంత ప్రయోజనం కలుగుతుంది.
అయితే విటమిన్ డిని రక్తపోటు మందులతో కలిపి తీసుకున్నప్పుడు దాని ప్రభావం మందు రకాన్ని బట్టి మారుతుంది. ముఖ్యంగా థయజైడ్ తరహా మూత్రవిసర్జన మందులు వాడేవారు జాగ్రత్తగా ఉండాలి. హైడ్రోక్లోరోథయజైడ్, క్లోర్తాలిడోన్ వంటి మందులు మూత్రం ద్వారా సోడియం, నీటిని బయటకు పంపడమే కాకుండా శరీరం నుంచి కాల్షియం బయటకు వెళ్లడాన్ని కూడా తగ్గిస్తాయి. మరోవైపు అధిక మోతాదులో విటమిన్ డి తీసుకుంటే పేగుల ద్వారా కాల్షియం శోషణ పెరుగుతుంది. ఈ రెండూ కలిసి రక్తంలో కాల్షియం స్థాయిలు అధికమయ్యే అవకాశం ఉంటుంది. రక్తంలో కాల్షియం ఎక్కువైతే వికారం, అలసట, తరచూ మూత్రం రావడం వంటి లక్షణాలు కనిపిస్తాయి. పరిస్థితి తీవ్రమైతే మూత్రపిండాలపై ఒత్తిడి పెరగడం లేదా గుండె స్పందనలో అసాధారణ మార్పులు కూడా వస్తాయి. అందుకే థయజైడ్ తరహా రక్తపోటు మందులు తీసుకునే వారు అధిక మోతాదులో విటమిన్ డి సప్లిమెంట్లను వైద్యుల సూచన లేకుండా తీసుకోకూడదు. అమ్లోడిపిన్, నిఫెడిపిన్ వంటి కాల్షియం ఛానల్ నిరోధక మందులతో సాధారణ మోతాదులో విటమిన్ డి తీసుకోవడం వల్ల సాధారణంగా పెద్దగా సమస్యలు ఉండవు. అయితే చాలా అధిక మోతాదులో విటమిన్ డి తీసుకోవడం వల్ల రక్తంలో కాల్షియం స్థాయిలు పెరిగే అవకాశం ఉంటుంది. ఇది రక్తనాళాల కండరాల స్పందనపై ప్రభావం చూపే అవకాశం ఉన్నందున ఇలాంటి మందులు వాడుతున్నవారు కూడా అధిక మోతాదులో విటమిన్ డి తీసుకునే ముందు వైద్యుల సలహా తీసుకోవడం మంచిది.
లిసినోప్రిల్ వంటి ఏసీఈ నిరోధకాలు, టెల్మిసార్టాన్ వంటి ఏఆర్బీ మందులు రక్తనాళాలను సడలించడం ద్వారా రక్తపోటును తగ్గించడంలో సహాయపడతాయి. విటమిన్ డి కూడా రక్తపోటు నియంత్రణకు సంబంధించిన రెనిన్ వ్యవస్థపై ప్రభావం చూపుతుంది. దీంతో కొన్ని సందర్భాల్లో విటమిన్ డి, ఈ మందులు కలిసి రక్తపోటు నియంత్రణకు అదనపు ప్రయోజనం అందించే అవకాశం ఉంటుంది. అయితే దీనిని దృష్టిలో ఉంచుకుని ఎవరూ సొంతంగా విటమిన్ డి మోతాదును పెంచకూడదు. విటమిన్ డి అధికంగా తీసుకోవడం వల్ల కలిగే సమస్యలు అరుదుగానే కనిపించినప్పటికీ, ఎక్కువ మోతాదులో సప్లిమెంట్లు తీసుకునే వారు అప్రమత్తంగా ఉండాలి. ముఖ్యంగా వారానికి 60,000 అంతర్జాతీయ యూనిట్ల వంటి అధిక మోతాదులను వైద్యుల పర్యవేక్షణ లేకుండా తీసుకోవడం వల్ల సమస్యలు తలెత్తే అవకాశం ఉంటుంది. కండరాల బలహీనత, నిరంతర అలసట, అధిక దాహం, తరచూ మూత్రం రావడం, వికారం, ఆకలి తగ్గడం, మలబద్ధకం వంటి లక్షణాలు కనిపిస్తే నిర్లక్ష్యం చేయకూడదు. కొందరిలో తల తిరగడం లేదా రక్తపోటులో అనూహ్యమైన మార్పులు కూడా కనిపిస్తాయి.
అధిక మోతాదులో విటమిన్ డి సప్లిమెంట్లు ప్రారంభించే ముందు రక్తంలో 25-హైడ్రాక్సీ విటమిన్ డి, కాల్షియం స్థాయిలను పరీక్షించుకోవడం ఉపయోగకరంగా ఉంటుంది. ముఖ్యంగా రక్తపోటు మందులను రోజూ తీసుకునే వారు ఈ పరీక్షల విషయంలో వైద్యుల సూచన పాటించాలి. సప్లిమెంట్ తీసుకున్న తర్వాత స్వల్పంగా కడుపులో అసౌకర్యం వంటి సమస్యలు ఎదురైతే మందులు, సప్లిమెంట్ తీసుకునే సమయాన్ని మార్చాలా అనే విషయాన్ని వైద్యులను అడగాలి. కొత్తగా విటమిన్ డి సప్లిమెంట్ ప్రారంభించినప్పుడు ఇంట్లో రక్తపోటును క్రమం తప్పకుండా కొలిచి నమోదు చేసుకోవడం కూడా ఉపయోగకరంగా ఉంటుంది. ముఖ్యంగా వైద్యుల సలహా లేకుండా అధిక మోతాదులో విటమిన్ డి తీసుకోవడం మంచిది కాదు. సాధారణ రోజువారీ మోతాదును మాత్రమే తీసుకోవాలి. లోపం నిర్ధారణ అయినప్పుడు మాత్రమే వైద్యులు సూచించిన చికిత్సా మోతాదులను తీసుకోవాలి. రక్తపోటు మందులు వాడుతున్నవారు విటమిన్ డి సప్లిమెంట్లను ప్రారంభించే ముందు తమ వైద్యుడికి సమాచారం ఇవ్వడం ద్వారా అనవసరమైన సమస్యలను నివారించవచ్చని నిపుణులు సూచిస్తున్నారు.
