లైంగిక జీవితంపై ఆసక్తి పోయింది.. మునపటిలా ఎంజాయ్‌ చేయలేకపోతున్నా

ఓ వయసుకు చేరుకోగానే.. జీవితం రొటీన్‌గా మారిపోతుంది. అప్పటివరకూ అద్భుతంగా అనిపించిన అనుభూతులన్నీ సర్వసాధారణం అయిపోతాయి. దీంతో నిరాసక్తత మొదలవుతుంది. ఆరోగ్య సమస్యలు, జీవిత భాగస్వామిలో చురుకుదనం లోపించడం, కుటుంబ బాధ్యతలు.. ఆసక్తిని సన్నగిల్లేలా చేస్తాయి.

నిన్న మొన్నటి వరకూ నా లైంగిక జీవితం బాగానే ఉండేది. ఆ అనుభూతి కోసం అర్రులు చాచేదాన్ని. నా జీవిత భాగస్వామికి సంతృప్తిని ఇచ్చేదాన్ని. నేనూ భావప్రాప్తి పొందేదాన్ని. కానీ ఈ మధ్య కాలంలో నన్ను జడత్వం ఆవహించింది. మునుపటిలా ఎంజాయ్‌ చేయలేకపోతున్నాను. ఇదేమైనా అనారోగ్యమా? మానసిక సమస్యా?

• ఓ సోదరి

ఓ వయసుకు చేరుకోగానే.. జీవితం రొటీన్‌గా మారిపోతుంది. అప్పటివరకూ అద్భుతంగా అనిపించిన అనుభూతులన్నీ సర్వసాధారణం అయిపోతాయి. దీంతో నిరాసక్తత మొదలవుతుంది. ఆరోగ్య సమస్యలు, జీవిత భాగస్వామిలో చురుకుదనం లోపించడం, కుటుంబ బాధ్యతలు.. ఆసక్తిని సన్నగిల్లేలా చేస్తాయి. లూబ్రికేషన్‌ తగ్గిపోవడం వల్ల కూడా ఇలా జరగొచ్చు.

మెనోపాజ్‌ లక్షణమైనా కావచ్చు. కాబట్టి, ఒకసారి లైంగిక వైద్య నిపుణులను సంప్రదించండి. మీ వంతుగా.. రొటీన్‌ నుంచి బయటపడే ప్రయత్నమూ చేయండి. ఓ వారం రోజులు జీవితభాగస్వామితో కలిసి ఎక్కడికైనా వెళ్లిరండి. పడకగది అలంకరణ మార్చండి. ఇద్దరూ ఇష్టాయిష్టాల గురించి మనసు విప్పి మాట్లాడుకోండి. కొత్త భంగిమలు ప్రయత్నించండి. ఊబకాయ సమస్య ఉంటే.. బరువు తగ్గండి. లైంగిక జీవితాన్ని సరికొత్తగా తీర్చిదిద్దుకునేందుకు చేయగలిగినవన్నీ చేయండి.