జుట్టు రాలిపోవడం అనేది ప్రస్తుత రోజుల్లో సర్వసాధారణ సమస్యగా మారింది. మారిన వాతావరణ పరిస్థితులు, కాలుష్యం కారణాలతోపాటు సరైన పోషకాలు అందకపోవడం వల్ల జుట్టు రాలిపోతున్నది. ఈ సమస్యను నివారించేందుకు ఒక్కొక్కరు ఒక్కో రకంగా శ్రమిస్తున్నారు. అయితే, చాలా మంది ఫలితంతో సంతృప్తి చెందడం లేదన్నది నగ్నసత్యం. హెయిర్ ఫాల్ ఎక్కువగా ఉంటే ఎవరికైనా బాధగానే ఉంటుంది. రోజులో 50 నుంచి 100 వరకు జుట్టు రాలడం సాధారణం. అయితే, ఈ రాలడం మరీ పెద్ద మొత్తంలో ఉంటే ఏంచేయాలి..? ఎలా నివారించుకోవాలి..? అనే అంశాలపై కొన్ని చిట్కాలు మీకోసం..
1) జుట్టును బిగుతుగా ఉండే హెయిర్ స్టైల్స్లో లేదా ఎత్తైన పోనీటెయిల్స్లో కట్టుకోకుండా చూసుకోవాలి. ఎందుకంటే ఇది జుట్టుకు మరింత రాపిడి, మరింత బిగుతును కలిగిస్తుంది. ఫలితంగా ఇది జుట్టు రాలడానికి దారితీస్తుంది.
2) సిల్క్ పిల్లో కవర్ని ఉపయోగించడం అలవాటు చేసుకోవాలి. ఇది రాపిడిని తగ్గించి జుట్టు పగలకుండా చేయడంతోపాటు రాలిపోకుండా కాపాడుతుంది.
3) హెయిర్ బాండ్స్ విచ్చిన్నానికి దారితీసే జుట్టుకు స్టైలింగ్ లేదా రసాయన చికిత్సలను నివారించండి.
4) జుట్టు రకం కోసం ఉద్దేశించిన షాంపూలు, కండీషనర్లను మాత్రమే ఉపయోగించడం అలవాటు చేసుకోండి.
5) జుట్టు పెరుగుదలను ప్రోత్సహించడమే కాకుండా జుట్టు చిట్లడం, జుట్టు రాలడాన్ని తగ్గించడానికి ప్రతిరోజూ కొన్ని హెయిర్ సీరమ్లను వాడాలి.
6) కంటి నిండా నిద్ర, ఒత్తిడి లేని జీవనశైలి ఎల్లప్పుడూ జుట్టు గట్టింగా ఉండేందుకు సహాయపడతాయి. అలాగే, ఆహారం విషయంలో హైడ్రేటెడ్గా ఉండేలా చూసుకోవాలి.
7) తల స్నానం చేసేటప్పుడు, నూనే మర్ధన చేసేటప్పుడు గోర్లతో గట్టిగా గీకకుండా చూసుకోవాలి.
8) వారంలో రెండు రోజులకు ఒకసారైనా తలస్నానం అలవాటు చేసుకోవాలి. అది కూడా చల్లటి లేదా గోరువెచ్చని నీటితో స్నానం చేయడం అలవాటు చేసుకోవాలి.
9) తలస్నానం చేసిన తర్వాత జుట్టును బాగా ఆరబెట్టాలి. హెయిర్ డ్రయ్యర్ను ఎట్టిపరిస్థితుల్లో వాడకూడదు.
10) హెయిర్ ఫాల్ లేకుండా చూసుకునేందుకు నిత్యం విటమిన్స్, మినరల్స్, ఖనిజాలు ఉండే ఆహారాలను తీసుకోవాలి. ఆకు కూరలు, కూరగాయలు, ఓట్స్, తృణధాన్యాలతోపాటు ప్రోటీన్స్, బీటా కెరోటిన్ ఎక్కువగా ఉండే ఆహారాలను తినాలి.
చివరగా, జుట్టు పోషణకు ఆముదం, కొబ్బరి నూనె వంటి వాటిని వాడుకోవటం మంచిది. రకరకాల ఆకృత్తుల్లో హెయిర్ స్టైల్స్ ఎదుటి వారికి చూసేందుకు బాగే ఉన్నా జుట్టు ఆరోగ్యాన్ని దెబ్బతీస్తాయని మరిచిపోవద్దు.