Thyroid | బరువులో హెచ్చుతగ్గులు, కుంగుబాటు, జుట్టు రాలడం, ఇవన్నీ థైరాయిడ్ లోపంతో వచ్చే సమస్యలు. అయోడిన్ లోపంతోపాటు జన్యువులు కూడా థైరాయిడ్ సమస్యకు కారణం అవుతాయి. పదిమంది మహిళల్లో నలుగురు తమ జీవితకాలంలో థైరాయిడ్ సమస్య బారినపడతారు అని ఓ అంచనా! ఈ సమస్య ఎదురైతే ఈ జాగ్రత్తలు పాటించాలని నిపుణులు చెబుతున్నారు.
ఒత్తిడి వల్ల హార్మోన్ అసమతుల్యం ఏర్పడి, థైరాయిడ్ హెచ్చుతగ్గులకు కారణం అవుతుంది. కాబట్టి మనసును ప్రశాంతంగా ఉంచుకునే
ప్రయత్నం చేయాలి.
జీర్ణాశయంలో ఉండే మంచి బ్యాక్టీరియాను కాపాడుకోవాలి. పీచు పదార్థాలు తినడం, పెరుగు లాంటి ప్రోబయాటిక్స్ తీసుకోవడం, తీపికి దూరంగా ఉండటం వల్ల పొట్టలో బ్యాక్టీరియా బాగుండి థైరాయిడ్ దుష్ప్రభావం తక్కువగా ఉంటుంది.
ప్రొటీన్స్ అధికమోతాదులో ఉండే ఆహారం తీసుకోవడం వల్ల థైరాయిడ్ హార్మోన్ కణాలకు అందుతుంది. ఇందుకోసం గుడ్లు, చేపలు, సోయామిల్క్ లాంటివి తీసుకోవచ్చు.
పొగతాగడం వల్ల థైరాయిడ్ సమస్యతోపాటు దాని దుష్ఫలితాలు కూడా పెరుగుతాయి.
క్యాబేజి, క్యాలిఫ్లవర్, పాలకూర, సోయాబీన్స్, వేరుశనగలాంటి కొన్ని పదార్థాలను గాయిట్రోజన్స్ అంటారు. ఇవి అయోడిన్ శరీరానికి అందకుండా చేస్తాయి. ఫలితంగా థైరాయిడ్ సమస్య పెరగవచ్చు.