నేస్తమా.. ఆస్తమాతో జాగ్రత్త!

ఉబ్బస వ్యాధి మనిషిని ఉక్కిరిబిక్కిరి చేస్తుంది. ఆయాసానికి గురిచేస్తుంది. ఆస్తమాకు అనేక కారణాలు. ఈ వ్యాధి జన్యుపరమైన కారణాల వల్ల రావచ్చు, పర్యావరణ ప్రభావాన్నీ తేలిగ్గా తీసుకోలేం. ధూమపానం తదితర దురలవాట్లు కూడా ఆస్తమాకు దగ్గర చేస్తాయి.

• నేడు ఆస్తమా డే

ఉబ్బస వ్యాధి మనిషిని ఉక్కిరిబిక్కిరి చేస్తుంది. ఆయాసానికి గురిచేస్తుంది. ఆస్తమాకు అనేక కారణాలు. ఈ వ్యాధి జన్యుపరమైన కారణాల వల్ల రావచ్చు, పర్యావరణ ప్రభావాన్నీ తేలిగ్గా తీసుకోలేం. ధూమపానం తదితర దురలవాట్లు కూడా ఆస్తమాకు దగ్గర చేస్తాయి. కుటుంబ సభ్యులు, సహోద్యోగులకు పొగాకు అలవాటు ఉన్నప్పుడు.. ఆ పరోక్ష ప్రభావం కూడా ఆస్తమాకు దారితీస్తుంది. ఆధునిక అధ్యయనాల ప్రకారం.. ఊబకాయం కూడా తొలి ముద్దాయిల జాబితాలో నిలుస్తున్నది.

ఆహార పద్ధతుల ద్వారా ఆస్తమాను కొంతమేర దూరంగా ఉంచవచ్చని నిపుణులు చెబుతారు. అల్లం, ఆవాల నూనె, అత్తిపండ్లు, వెల్లుల్లి తరచూ తీసుకోవడం మంచిదని చెబుతారు. ఇన్‌ఫ్లుయెంజా, న్యుమోనియా టీకాలతో ఆస్తమాను కట్టడి చేయవచ్చు. ఎలర్జీ కలిగించే వాతావరణాలు, ఘాటు వాసనలు మొదలైనవాటికి దూరంగా ఉండటం ఉత్తమం. వ్యక్తిగత పరిశుభ్రత కూడా ముఖ్యం.

వంటగది, బాత్‌రూమ్‌, పడకగది మొదలైనవాటిని తరచూ శుభ్రం చేయాలి. ప్రాథమికంగా ఇది శ్వాసనాళాలు కుంచించుకుపోవడం వల్ల వచ్చే సమస్య కాబట్టి.. ఆ వ్యవస్థను సురక్షితంగా కాపాడుకుంటే చాలు. ఈ మహమ్మారి పిల్లలనూ వదిలిపెట్టడం లేదు. చిన్నారులలో శ్వాసకు సంబంధించి ఏ సమస్య ఉన్నా వెంటనే నిపుణులను సంప్రదించాలి. ఏటా మే రెండో తేదీని ‘ఆస్తమా డే’గా జరుపుకొంటారు. ‘ఆస్తమా కేర్‌ ఫర్‌ ఆల్‌’ ఈ ఏడాది నినాదం.