చర్మం, కురుల నిగారింపునకు కొలాజెన్ చాలా అవసరమని విన్నాను. ఎలాంటి ఆహారం తీసుకోవడం ద్వారా కొలాజెన్ వృద్ధి చేసుకోగలం. కొలాజెన్ సప్లిమెంట్ల వల్ల ఏమైనా ఫలితం ఉంటుందా?
కొలాజెన్ మన శరీరంలో తయారయ్యే ఒక ప్రొటీన్. ఇది మన శరీర కణాల మధ్య కనెక్టివ్ టిష్యూగా పనిచేస్తుంది. కణజాలాన్ని పట్టి ఉంచుతుంది. శరీరంలో అమైనో ఆమ్లాల సంశ్లేషణ ద్వారా ఇది తయారవుతుంది. చర్మం, వెంట్రుకలు, ఎముకలు, మృదులాస్థి తదితర భాగాల్లో కణాలకు పటుత్వాన్ని, సాగే గుణాన్ని ఇస్తుంది. అయితే, వయసు పెరిగేకొద్దీ శరీరంలో కొలాజెన్ ఉత్పత్తి తగ్గిపోతూ ఉంటుంది. అందుకే చిన్నతనంలో పకడ్బందీగా ఒకదానికొకటి ముడివడి ఉండే కణజాల వ్యవస్థ, ఆ తర్వాత కాస్త గజిబిజిగా తయారవుతుంది. అతిగా ఎండలో తిరగడం, కాలుష్యం, మద్యపానం, ధూమపానం, నిద్రలేమి, వ్యాయామం లేకపోవడం లాంటివి కూడా కొలాజెన్ స్థాయి త్వరగా పడిపోవడానికి కారణాలు. సమతులాహారం, చక్కని వ్యాయామం ద్వారా మెరుగుపడేలా చూసుకోవచ్చు.
మాంసం, చేపల్లో కొలాజెన్ ఉత్పత్తికి పనికొచ్చే పోషకాలు ఎక్కువ. ఇది శరీరంలో తయారయ్యే ప్రొటీన్. అందువల్లే మొక్కల్లో కొలాజెన్ లభించదు. కాబట్టి వెజిటేరియన్ కొలాజెన్ పేరుతో ఎవరైనా సప్లిమెంట్లు అమ్మితే తీసుకోవద్దు. వీటివల్ల పెద్దగా ఫలితం ఉండదు. నీళ్లు బాగా తాగడం, యాంటీ ఆక్సిడెంట్లు అధికంగా ఉండే పండ్లు, కూరగాయలు, గింజల్లాంటి వాటిని ఆహారంలో భాగం చేసుకోవడం, చిన్నపాటి వ్యాయామాలు, మంచి నిద్ర… కొలాజెన్ ఉత్పత్తిని వృద్ధి చేస్తాయి. అన్నిటికీ మించి సంతోషంగా ఉండటం, సానుకూల దృక్పథంతో వ్యవహరించడం వల్ల శరీరం కూడా ఉత్తేజితం అవుతుంది. అన్ని చర్యలూ చక్కగా జరుగుతాయి. ఎంతో కళగాకనిపిస్తాం. కొలాజెన్ జుట్టుకే కాదు మీకూ అవసరమే.
– మయూరి ఆవుల న్యూట్రిషనిస్ట్ Mayuri.trudiet@gmail.com