Avocado | గుండె ఆరోగ్యంగా ఉండాలని కోరుకునేవారు ఈ పండు తప్పక తినాల్సిందే!

గుండెకు అండ.. అవకాడో గుండె ఆరోగ్యం మీద అవకాడో మంచి ప్రభావాలు చూపుతుందని ఇప్పటికే ఎన్నో పరిశోధనలు నిరూపించాయి. తాజాగా మరొక అధ్యయనమూ ఆ జాబితాలో చేరింది. మిగిలిన వాళ్లతో పోలిస్తే అవకాడో క్రమం తప్పకుండా తినేవాళ్లలో మంచి కొలెస్ట్రాల్‌ ఎక్కువగా, చెడు కొలెస్ట్రాల్‌ తక్కువగా ఉంటాయట.

గుండెకు అండ.. అవకాడో

గుండె ఆరోగ్యం మీద అవకాడో మంచి ప్రభావాలు చూపుతుందని ఇప్పటికే ఎన్నో పరిశోధనలు నిరూపించాయి. తాజాగా మరొక అధ్యయనమూ ఆ జాబితాలో చేరింది. మిగిలిన వాళ్లతో పోలిస్తే అవకాడో క్రమం తప్పకుండా తినేవాళ్లలో మంచి కొలెస్ట్రాల్‌ ఎక్కువగా, చెడు కొలెస్ట్రాల్‌ తక్కువగా ఉంటాయట. అంతేకాదు, మొత్తం కొలెస్ట్రాల్‌ స్థాయి కూడా వీరిలో తక్కువగా కనిపించిందట. కాబట్టి గుండె ఆరోగ్యాన్ని కోరుకునేవారంతా అవకాడో తప్పక ఆరగించండి.

రిస్ట్‌బ్యాండ్‌ కడుక్కోండి
ఫ్రెండ్‌షిప్‌ డే అనో, పుట్టినరోజు అనో దోస్తులు బహుమతిగా ఇచ్చిన రిస్ట్ట్‌బ్యాండ్లను ఎంతో అపురూపంగా అందుకుంటాం. ఇష్టంగా చేతికి తొడుక్కుంటాం. రోజుల తరబడి చూసుకుని మురిసిపోతాం. కానీ, వాటిని శుభ్రం చేసుకోవడం గురించి మాత్రం అసలే పట్టించుకోం. కాబట్టే అమెరికా పరిశోధకులు అపరిశుభ్రంగా ఉండే రిస్ట్‌ బ్యాండ్లు 95 శాతం వరకు ప్రమాదకరమని హెచ్చరిస్తున్నారు. వీటిలో కూడా బంగారు, వెండి కంటే ప్లాస్టిక్‌, రబ్బరు బ్యాండ్ల మీద బ్యాక్టీరియా ఎక్కువగా పోగుపడుతుందట. మురికి రిస్ట్‌బ్యాండ్లు… స్టెఫలోకోకస్‌, సూడోమోనాస్‌, ఎశ్చరీషియా కొలి (ఈ.కొలి) నిలయాలు. వీటి కారణంగా హానికరమైన బ్యాక్టీరియా సంక్రమిస్తుంది. అలా రిస్ట్‌బ్యాండ్లు రోగ కారకాలవుతాయని పరిశోధకులు గుర్తుచేస్తున్నారు.

లేత మనసు కష్టపెట్టొద్దు
అంత ఆకర్షణీయంగా లేనివారు, క్రీడల్లో పెద్దగా రాణింపులేని కౌమార వయస్కులకు జీవితం కఠినంగానే ఉంటుంది. స్కూల్లో తరచూ శిక్షలు తప్పవు. స్నేహితుల మధ్య కూడా అంత ఆదరణ దొరకదు. ఇదే వాళ్లలో ఏకాకితనానికి దారితీస్తుంది. మనసు అదుపు తప్పుతుంది. దీంతో నలుగురిలో తలదించుకోవాల్సిన పరిస్థితి తలెత్తుతుంది. ఫలితంగా సమాజం పట్ల ఏహ్యభావాన్ని పెంచుకుంటారు. దాన్ని అధిగమించడానికి వ్యసనాల బాటపడతారు. అమెరికాలోని ఫ్లోరిడా అట్లాంటిక్‌ యూనివర్సిటీ కౌమార వయస్కుల సామాజిక జీవితం గురించి ఈ సరికొత్త పరిశోధన చేసింది. కాబట్టి, పిల్లల మనసులను కష్టపెట్టకూడదు.