కరువు ముంచుకొచ్చి కాటేయకముందే!

మూటాముల్లె సర్దుకుని నమ్మకాన్ని ఆడనే వదిలేసుకుని గింజల్ని పైసల్కి అమ్ముకుని వలసెళ్లిపోవాలేమో

మూటాముల్లె సర్దుకుని
నమ్మకాన్ని ఆడనే వదిలేసుకుని
గింజల్ని పైసల్కి అమ్ముకుని
వలసెళ్లిపోవాలేమో

నెర్రులిడిచిన నేల పొరల్లో ఇరుక్కుని
ఊపిరాడక కూలబడేకన్నా
అరువు బరువు నెత్తిని చిట్లించకముందే
కరువు పాము కాటేయకముందే
సామాన్లు సర్దుకోవడం మంచిదేమో

కారుమబ్బు కమ్ముకోకముందే
పల్చటి చినుకు వెక్కిరించకముందే
మొలకలేని సెలక అంగలార్చకముందే
తట్టాబుట్ట చేతబట్టి వలసెళ్లాలేమో

చినుకు లేని చింత చిదిమేయకముందే
పంట లేని వ్యథ కబళించకముందే
బీడు భూమి కండ్లు చెమ్మగిల్లకముందే
ఉష్ణతాపంతో మేఘం చెదిరిపోకముందే
తలుపులు మూసి గాలికి ఎదురేగాలేమో

గాలి దుమారం విసిరివేయకముందే
పొడిబారిన నేల నిప్పు రాజేయకముందే
ఆర్థిక వలలో బందీ కాకముందే
కాలం కాని కాలం గవిలో తలదాచకనే
కంటిమీద రెప్పవాల్చని స్థితికి రాకముందే
భత్యం కోసం బతుకు బండి నడపాలేమో
ఎదురుగాలికి పయనం తప్పదేమో

నరెద్దుల రాజారెడ్డి
9666016636