మహాకవి

ఎందుకో ఈ పూట
నిన్ను తలవాలనిపిస్తుంది
ఓ కవిగా, నిన్నో మహాకవిగా
పిలవాలనిపిస్తుంది
ఎన్ని సంఘటనలను
కళ్ళకత్తుకుందో నీ కలం
ఎన్ని సన్నివేశాలను
గుండెకెత్తుకుందో నీ కాగితం
జీవం నుంచి జీవితం దాకా
జీవితం నుంచి నిర్జీవం దాకా
నీటి నుంచి నిప్పు దాకా
నిప్పు నుంచి అడుగంటిన నెత్తురు దాక
ఎన్ని కవితోద్యమాలను
ఎగజిమ్మిందో నీ చింతన
ఎన్ని రసధునులను
పారించిందో నీ యోచన
నగరంలో ఎప్పుడు వానొచ్చిన
మా నయనాల ముందు
నువ్వు కవిత్వమై
కురిసినట్టుంటది
బ్రతుకులో ఎప్పుడు బాధొచ్చినా
ఆ బాదరబందీల కూటమిపై
నువ్వు నయాగరై దుమికినట్టుంటది
వచన కవితా కదనాన
జెండాపై కవిరాజా
ఎందుకో ఈ పూట
నిన్ను కొలవాలనిపిస్తుంది
ఓ కవిగా, నిన్నో మహాకవిగా
పిలవాలనిపిస్తుంది
వచన కవితా కదనరంగాన
నేడు వచన కవితా పితామహుడు కుందుర్తి ఆంజనేయులు జయంతి

డాక్టర్‌ చింతల రాకేశ్‌ భవాని
92466 07551