స్ఫూర్తి పతాక

స్వాతంత్రోద్యమ స్ఫూర్తి అంటే..
దేహం బుల్లెట్ల జల్లెడైనా వెరువక
శిఖరం మీదకి ఎగబాకి
తోటి జవాన్లకు దారి దీపమై
మార్గనిర్దేశనం చేసిన సుబేదారి
యోగేంద్రసింగ్‌ యాదవ్‌
తూట్లుపడ్డ గుండె నడుగు!

స్వాతంత్రోద్యమ స్ఫూర్తి అంటే..
దేశం ముక్కలు కాకూడదంటూ
గాయపడ్డ కాలుని తానే నరికేసుకొని
యుద్ధంలో తిరిగి దూకిన
మేజర్‌ జనరల్‌ ఇయాన్‌ కార్డోజ్‌
ధైర్యాన్ని అడుగు!

స్వాతంత్రోద్యమ స్ఫూర్తి అంటే..
త్రివర్ణ పతాకాన్ని కార్గిల్‌పై ఎగరేసేందుకు వెళ్లి
విగత దేహానికి చుట్టుకొచ్చిన
విక్రమ్‌ బాత్రా భార్య కుంకుమ బొట్టునడుగు!

స్వాతంత్రోద్యమ స్ఫూర్తి అంటే..
బంగ్లా విమోచనోద్యమంలో
కరాచీ రేవులోకి దూసుకెళ్లి
దడ పుట్టించిన భాబృభన్‌ యాదవ్‌ పొందిన
తొలి మహా వీరచక్ర పురస్కారాన్ని అడుగు!

స్వాతంత్రోద్యమ స్ఫూర్తి అంటే..
తాజ్‌ హోటల్‌ ఉగ్ర తాండవంలో
సహోద్యోగుల్లో బాసట కోసం
చావుకు ఎదురెళ్లి కౌగిలించిన
హేమంత్‌ కర్కరే రక్తంతో రంగు మారిన కోటునడుగు

స్వాతంత్రోద్యమ స్ఫూర్తి అంటే..
దేశ విభజనలో కుటుంబం తరలిపోయినా
ఆఖరి శ్వాస వరకూ పోరాడుతూ పోయిన
బిగ్రేడియర్‌ మహమ్మద్‌ ఉస్మాన్‌
అవివాహిత జీవితాన్ని అడుగు!

స్వాతంత్య్రం అంటే..
మనని మనం నియంత్రించుకోవటం మాత్రమే కాదు
ఉగ్రవాద దృష్టితో
సామ్రాజ్యవాద కాంక్షతో
చూసే చూపుని పాతరేయ్యటం

స్వేచ్ఛ.. మనజాతి నినాదమే కాదు
దేశ సమైక్య వేదం కూడా అని చాటిచెప్పటం!

మిత్రమా!
స్వాతంత్రోద్యమ స్ఫూర్తిని
ఒక్క మాటలో నిర్వచించమని మళ్లీ అడుగుతున్నవా?
అయితే చెబుతా విను మనలో నిలబడ్డ దేశాన్ని
విశ్వశాంతి ఆకాశంలో
ఆత్మగౌరవ జెండాలా ఎగరెయ్యటం..!

సుధా శేఖర్‌ , మిల్వాకీ
+001 6306216815

ఇవి కూడా చదవండి :

కొన్నది వంకాయ.. కొసిరేది గుమ్మడికాయ

సంస్కృతానికి అగ్రాసనం

బెక్కల్లు శాసనము

సాగరం.. నమస్కారం

కలల పడవ!