మరపో వెరపో ఉదాసీనతో
నిర్లక్ష్యమో నానిన నోటినుంచి రాలిన మంత్రాక్షరాలనో
తెలంగాణ పేరు మూలకుపడ్డది
నిండైన చెరువులో కొట్టి కొట్టి, అలసి, నిద్ర కమ్ముకొచ్చింత ఈత
అడుగు బొడుగు రాళ్లు తేలి వెక్కిరిస్తున్నయి
రైతు భుజాన నాగలి
మళ్లీ జీసస్ చరమాంకం గుర్తుకు తెస్తున్నది
కాకతీయ కళాతోరణం కళ
నాలుక మీది మాటలా మెలిక పడ్డది
గోల్కొండ కోట మువ్వన్నెల ధీరత్వం వొదిలి
జీకు పిట్టల వశమైనది
మల్లినాథుని నుడుగుల పల్లీయత
తిట్ల రోతలో కుములుతున్నది
పునఃనిర్మాణ వైభవం శ్వేతపత్రంలో
నల్లమొగంతో తెల్లబోయింది
మూసీ తెల్లపండ్ల నవ్వుల కోసం
అమ్మ పరువు కాళ్ల బేరమయ్యింది
కంచెల్లేని పైరవీ స్వైరవిహారంలో
వినతుల వెతల విన్నపా లెవరికి?
నమూనాలన్ని ఎడమచేతి రాతకు గురౌతున్నయి
కాళేశ్వరం రోగగ్రస్థ శాపగ్రస్థ అని ముద్ర వేయించుకున్నది
ఖజానా ఉచితాల కర్ర కాళ్లతో నిలదొక్కుకోలేక చతికిల పడింది
గత దశమం ఉత్తదేనా?
అయోమయ ఇంద్రజాలమేనా?
కలలోనే నడిచినమా?
(మహాధిప మనోగతం, అసామాన్య ప్రజాక్షేత్రం
పెను సంఘర్షణా పరిణామ ఉప్పెనా విభ్రమ ఫలమా?)
మౌన ఋషిత్వ అంతర్ముఖీన విచికిత్సలో
సత్యజ్ఞాన ప్రకాశ మహోదయం సంభవించేనా!)
మూడున్నర కోట్ల నిగళాల ముక్తగానం,
పైశాచీ ఆనందాల రాజకీయం
వికృత క్రీడల విముక్త తెలంగాణ
ఎప్పుడు తల్లీ! ఓ కంజాతవల్లీ!
– మనస్విని