జనం సొమ్ముతో కాంగ్రెస్‌ జాతర

ఉమ్మడి రాష్ట్రంలో పదిహేనేండ్ల క్రితం ఉభయ గోదావరి జిల్లాల రైతులు క్రాప్‌ హాలిడే ప్రకటిస్తే యావత్తు దేశంలో చర్చ జరిగింది.

సమైక్య రాష్ట్రంలో తెలంగాణలో నిత్యకృత్యమైన రైతుల ఆత్మహత్యలు మళ్లీ మొదలయ్యాయి. అన్నదాతలను కరువు కాటేస్తున్నది. కాంగ్రెస్‌ ప్రభుత్వం ఈ సారి 65 లక్షల ఎకరాలకు కూడా సాగునీరు అందించలేని దుస్థితిలో ఉన్నది. ఉమ్మడి రాష్ట్రంలో 2011లో ఉభయ గోదావరి జిల్లాల్లో రైతులు క్రాప్‌ హాలిడే ప్రకటించడం దేశంలోనే సంచలనంగా మారింది.

రైస్‌బౌల్‌గా పేరు పొందిన ఉభయ గోదావరి జిల్లాల్లో సుమారు 200కు పైగా గ్రామాల్లో దాదాపు 85 వేల ఎకరాల్లో ఖరీఫ్‌ సీజన్‌లో పంటలు వేయకుండా రైతులు నిరసన తెలుపడంపై సర్వత్రా చర్చ జరిగింది. ధాన్యానికి గిట్టుబాటు, మద్దతు ధరలు లేకపోవడం, ఎరువుల ధరల పెరుగుదల వంటి సమస్యలతో అన్నదాతలు ఆందోళనబాట పట్టారు. ప్రభుత్వ మాజీ ప్రధాన కార్యదర్శి మోహన్‌ కందా ఆధ్వర్యంలో అప్పటి ప్రభుత్వం ఓ కమిటీ వేసింది. నేడు తెలంగాణలో కూడా నాటి పరిస్థితులు ప్రస్ఫుటంగా కనిపిస్తున్నాయి.

ఉమ్మడి రాష్ట్రంలో పదిహేనేండ్ల క్రితం ఉభయ గోదావరి జిల్లాల రైతులు క్రాప్‌ హాలిడే ప్రకటిస్తే యావత్తు దేశంలో చర్చ జరిగింది. నేడు తెలంగాణలో ఇప్పుడు అధికారిక లెక్కల ప్రకారమే 65 లక్షల ఎకరాల్లో వరి పంట వేయకుండా ప్రభుత్వమే నిషేధం విధించింది. అనధికారికంగా క్రాప్‌ హాలిడే ప్రకటించింది. 2026-27 రబీ సీజన్‌లో వరి పంట వేయవద్దు అని ముఖ్యమంత్రి ఆదేశాలు ఇచ్చారు. ‘రైతులు నష్టపోవద్దు అనే పెద్ద మనసుతో ప్రభుత్వం ఇచ్చిన ఆదేశాలే తప్ప, క్రాప్‌ హాలిడే అని బాధపడొద్దు’ అని వ్యవసాయశాఖ మంత్రి తుమ్మల నాగేశ్వరరావు చెప్పుకొచ్చారు.

2011లో ఉభయగోదావరి జిల్లాల క్రాప్‌ హాలిడేను నాటి ప్రతిపక్షాలు జనంలోకి తీసుకువెళ్లాయి. అప్పుడు రెండు జిల్లాల్లో సమస్య గురించి టీడీపీ సీనియర్‌ నాయకుడిగా ఉన్న తుమ్మల నాగేశ్వరరావు, అప్పటి కాంస్‌ ప్రభుత్వాన్ని ఎండగట్టారు. ఇప్పుడు మాత్రం క్రాప్‌ హాలిడేకు పెద్ద మనసు అనే ముద్ర వేస్తున్నారు. నీటి అవసరం తక్కువగా ఉండే పంటలు వేసుకోవాలని ఉచిత సలహాలు ఇస్తున్నారు. ప్రాజెక్టులను ఎండబెట్టిన పాలకులు, తాగడానికి కూడా నీళ్లు లేవని చేతులెత్తేస్తున్నారు. చాలా ఏండ్ల తర్వాత ప్రజలకు కాంగ్రెస్‌ పాలకులు కరువు రుచి చూపిస్తున్నారు.

తెలంగాణ ఏర్పడిన తర్వాత హైదరాబాద్‌ మహానగరం ఎప్పుడూ లేని విధంగా ఇప్పుడు తాగునీటి కొరతను ఎదుర్కొంటున్నది. ఎల్‌ నినో వల్ల ఇప్పుడే ఇలా ఉన్నదంటే మరో రెండు మూడు నెలల్లో కాంగ్రెస్‌ పాలన విశ్వరూపాన్ని రాజధాని నగరం చూడబోతున్నదని అర్థమవుతున్నది. హైదరాబాద్‌లో ఐటీ కంపెనీలు ఉన్న ప్రాంతంలో ఇప్పటికే నీటి కొరతతో ప్రైవేట్‌ హాస్టళ్లు మూసేశారు.

బుద్ధోదయం

కార్పొరేట్‌ కాలేజీలు, స్కూళ్లు సెలవులు ప్రకటించాయి. తాగునీటికే దిక్కులేని పరిస్థితిలో సాగునీటి గురించి ఆలోచించే అవకాశమే లేదు. ఇంతకాలానికి మేడిగడ్డ బరాజ్‌లోని రెండు పిల్లర్ల మరమ్మతులకు ప్రభుత్వం సిద్ధమైంది. లక్ష కోట్ల దుర్వినియోగం అంటూ ప్రచారం సాగించి, ఎన్నికల సమయంలో కాంగ్రెస్‌ రాజకీయ లబ్ధి పొందింది. ఎన్నికల్లో గెలిచి అధికారం చేపట్టింది. ఆ తర్వాత కాళేశ్వరం నిర్మించిన కంపెనీయే ఒప్పందం మేరకు తామే మరమ్మతులు చేస్తామని అప్పుడే ముందుకు వచ్చింది. అయినా కాంగ్రెస్‌ పాలకులు అంగీకరించలేదు. కాళేశ్వరం ద్వారా నీటి సరఫరా జరిగితే క్రెడిట్‌ కేసీఆర్‌కు వస్తుంది.

ప్రాజెక్టును ఎండబెట్టడం ద్వారా రాజకీయ ప్రయోజనం పొందాలి అని కాంగ్రెస్‌ యత్నించింది. కాంగ్రెస్‌కు లభించిన రాజకీయ ప్రయోజనం ఎలా ఉన్నా, పిల్లర్లకు మరమ్మతు చేయకపోవడం ద్వారా కలిగిన నష్టం ఎల్‌ నినో ద్వారా రైతులకు తెలిసి వచ్చింది. రైతులు కాంగ్రెస్‌ నాయకులను నిలదీస్తుండటం, వర్షాలు లేకపోవడం కరువు తీవ్రంగా ఉండటంతో మరమ్మతులకు ప్రభుత్వం ఎట్టకేలకు ముందుకు వచ్చింది. కాంగ్రెస్‌ ప్రభుత్వానికి మొదట్లోనే ఈ సోయి ఉండి ఉంటే రైతులకు ప్రస్తుత దుస్థితి వచ్చేది కాదు.

తెలంగాణలో దుర్భిక్ష పరిస్థితి ఇంత తీవ్రంగా ఉంటే ప్రభుత్వం మాత్రం పట్టించుకోవడంలేదు. కరువును, రైతులను, ప్రజల సమస్యలను పక్కన పెట్టి కాంగ్రెస్‌ కోసం భారత్‌ సమ్మిట్‌ నిర్వహిస్తున్నది. సాధారణంగా సమ్మిట్‌ అంటే పెట్టుబడుల ఆకర్షణ కోసం నిర్వహిస్తున్నారేమో అనుకుంటారు. భారత్‌ సమ్మిట్‌ ఉద్దేశం అంతర్జాతీయ ప్రగతిశీల రాజకీయ శక్తులతో కాంగ్రెస్‌ సంబంధాలు పెంచుకోవడం ప్రధాన ఉద్దేశం.

దేశంలో కాంగ్రెస్‌ పరిస్థితి దయనీయంగా ఉన్నది. తెలంగాణ, కర్ణాటక, హిమాచల్‌ప్రదేశ్‌లో ఈ పార్టీ అధికారంలో ఉన్నది. కర్ణాటక, హిమాచల్‌ప్రదేశ్‌లోని ప్రభుత్వాల పెద్దలు చేతులెత్తేయడంతో సమ్మిట్‌ భారం తెలంగాణ మీద పడింది. రాష్ట్ర ప్రభుత్వం ప్రజల నిధులతో కాంగ్రెస్‌ సభను నిర్వహిస్తున్నది.

నరేంద్రమోదీ నార్వేలో పర్యటించినప్పుడు అక్కడి జర్నలిస్ట్‌ హెలె లింగ్‌ ‘మీరు విలేకరుల ప్రశ్నలకు సమాధానం ఎందుకు చెప్పరు’ అని ప్రధానిని ప్రశ్నించారు. హైదరాబాద్‌లో జరిగే భారత్‌ సమ్మిట్‌కు మీడియా స్వేచ్ఛ మీద మాట్లాడేందుకు ఆమెను పిలిచారు. కానీ ఆమె వీసాను కేంద్రప్రభుత్వం రద్దు చేసింది. సమ్మిట్‌ గురించిన ప్రచారం కన్నా ఆమె వీసా రద్దు కావడంపై ప్రచారం ఎక్కువ జరుగుతున్నది.

ముఖ్యమంత్రి రేవంత్‌రెడ్డి ఆధ్వర్యంలో జరుగుతున్న భారత్‌ సమ్మిట్‌లో చర్చించే ప్రధాన అంశాల్లో మీడియా స్వేచ్ఛ అనే అంశం కూడా ఉన్నది. మీడియాను రేవంత్‌రెడ్డి తిట్టినట్టుగా గల్లీ లీడర్లు కూడా తిట్టి ఉండరు. విలేకరుల సమావేశంలో ‘మీ డీఎన్‌ఏ పరీక్ష చేసుకోండి’ అని మీడియా ప్రతినిధులను లెక్కలేనన్ని సార్లు తిట్టారు. అలాంటి రేవంత్‌రెడ్డి భారత్‌ సమ్మిట్‌లో పత్రికా స్వేచ్ఛపై ఏ విధంగా మాట్లాడుతారో చూడాలి.

ఈ సమ్మిట్‌కు కాంగ్రెస్‌ నాయకులు మల్లిఖార్జున ఖర్గే, రాహుల్‌గాంధీ, ప్రియాంకా గాంధీని పిలిచారు. ఒకవైపు కరువుతో రైతులు సంక్షోభంలో కొట్టుమిట్టాడుతుంటే ప్రజల సొమ్ముతో ప్రభుత్వం భారత్‌ సమ్మిట్‌ పేరుతో కాంగ్రెస్‌ సమ్మిట్‌ నిర్వహిస్తుండటం పట్ల సర్వత్రా విమర్శలు వ్యక్తమవుతున్నాయి.

నరేంద్రమోదీ నార్వేలో పర్యటించినప్పుడు అక్కడి జర్నలిస్ట్‌ హెలె లింగ్‌ మీరు విలేకరుల ప్రశ్నలకు సమాధానం ఎందుకు చెప్పరు అని ప్రధానిని ప్రశ్నించారు. హైదరాబాద్‌లో జరిగే భారత్‌ సమ్మిట్‌కు మీడియా స్వేచ్ఛ మీద మాట్లాడేందుకు ఆమెను పిలిచారు. కానీ ఆమె వీసాను కేంద్రప్రభుత్వం రద్దు చేసింది. సమ్మిట్‌ గురించిన ప్రచారం కన్నా ఆమె వీసా రద్దు కావడంపై ప్రచారం ఎక్కువ జరుగుతున్నది.

-బుద్దా మురళి