ఎవరీ విద్యుజ్జిహ్వుడు?

ఇటీవల నితేశ్‌ తివారి దర్శకత్వంలో ‘రామాయణం’ చిత్రం ఇతిహాస గాథను వెండితెరపై అద్భుతంగా ఆవిష్కరించింది. రామాయణం ఎన్నిసార్లు చదివినా వీనులకు విందే! ఎన్నిసార్లు సినిమాగా వచ్చినా కన్నులకు పండువే! తాజా రామాయణమూ అందరినీ అలరిస్తున్నది! అయితే, వెండితెర మీద ఇప్పటి వరకు వచ్చిన ఏ రామాయణంలో నూ కనిపించని విద్యుజ్జిహ్వుడి పాత్ర నితేశ్‌ తివారీ చిత్రంలో ప్రధాన ఆకర్షణగా నిలిచింది. రావణుడి చేతిలో వీర మరణం పొందిన విద్యుజ్జిహ్వుడు ఎవరంటే..

ఇటీవల నితేశ్‌ తివారి దర్శకత్వంలో ‘రామాయణం’ చిత్రం ఇతిహాస గాథను వెండితెరపై అద్భుతంగా ఆవిష్కరించింది. రామాయణం ఎన్నిసార్లు చదివినా వీనులకు విందే! ఎన్నిసార్లు సినిమాగా వచ్చినా కన్నులకు పండువే! తాజా రామాయణమూ అందరినీ అలరిస్తున్నది! అయితే, వెండితెర మీద ఇప్పటి వరకు వచ్చిన ఏ రామాయణంలో నూ కనిపించని విద్యుజ్జిహ్వుడి పాత్ర నితేశ్‌ తివారీ చిత్రంలో ప్రధాన ఆకర్షణగా నిలిచింది. రావణుడి చేతిలో వీర మరణం పొందిన విద్యుజ్జిహ్వుడు ఎవరంటే..

వాల్మీకి రామాయణంలోని ఉత్తరకాండలో విద్యుజ్జిహ్వుడి ప్రస్తావన వస్తుంది. లంకానగరానికి రాజుగా పట్టాభిషిక్తుడైన తర్వాత రావణుడు తన చెల్లెలు శూర్పణఖకు కాలకేయ దానవ నాయకుడైన విద్యుజ్జిహ్వుడితో వివాహం జరిపించాడు. కాలకేయుల ఆధీనంలోని అశ్మనగరం రసాతలంలో ఉండేది. శ్రీమద్భాగవతంలోని పంచమ స్కంధం, 24వ అధ్యాయం, ఏడో శ్లోకం ప్రకారం భూలోకానికి దిగువన ఉన్న ఏడు అధోలోకాలలో రసాతలం ఆరోది. ఇక భాగవతంలోని షష్ఠ స్కంధం, ఆరో అధ్యాయం కాలకేయులను మహాబలశాలులైన దానవ యోధులుగా వర్ణిస్తుంది.

కాలకేయుల ప్రస్తావన మహా భారతంలోని వనపర్వంలోనూ వస్తుంది. ఇంద్రలోకం నుంచి తిరిగి వస్తున్న అర్జునుడు హిరణ్యపురంలో నివసించే కాలకేయులతో తలపడతాడు. దేవతలకు సైతం అజేయులుగా వరం పొందిన ఆ అసురసేనను అర్జునుడు తన దివ్యాస్ర్తాలతో, ముఖ్యంగా రౌద్రాస్త్ర ప్రయోగంతో సంహరించినట్లు ఈ ఘట్టం వివరిస్తుంది.

ఇక, రావణుడు తన దిగ్విజయ యాత్రలో భాగంగా యమలోకంపై దండెత్తిన అనంతరం రసాతలంలో ప్రవేశిస్తాడు. అక్కడ తొలుత వాసుకి పాలనలోని భోగవతి నగరానికి చేరుకుని నాగులను వశపరచుకుంటాడు. అనంతరం రత్నమయమైన మణిమయ పురికి వెళ్తాడు. అక్కడ బ్రహ్మదేవుడి వరప్రభావంతో బలగర్వితులైన నివాతకవచులతో ఏడాది పాటు యుద్ధం చేస్తాడు. చివరకు బ్రహ్మదేవుడి జోక్యంతోనే వారితో అగ్నిసాక్షిగా స్నేహం కుదుర్చుకుంటాడు. ఆ తర్వాత జలాలకు అధిపతి, పశ్చిమ దిక్పాలకుడైన వరుణుడి నగరాన్ని అన్వేషిస్తూ రసాతలంలో సంచరించిన రావణుడు కాలకేయులు నివసించే అశ్మనగరానికి చేరుకుంటాడు. వారిపై దండెత్తి అనేకమందిని సంహరిస్తాడు. కాలకేయ వంశానికి చెందిన విద్యుజ్జిహ్వుడు కూడా యుద్ధరంగంలో వీరోచితంగా పోరాడి దశకంఠుడైన రావణుడి ఖడ్గప్రహారంతో వీరమరణం పొందుతాడు.

భర్త మరణవార్త విన్న శూర్పణఖ తీవ్రంగా విలపిస్తుంది. తన భర్త తన ప్రాణాలకంటే ఎక్కువని, అతణ్ని చంపి తన సౌభాగ్యాన్ని చెరిపేశావంటూ అన్నను నిలదీస్తుంది. యుద్ధావేశంలో తనవారెవరో, శత్రువులెవరో గుర్తించలేక విద్యుజ్జిహ్వుడిని చంపానని రావణుడు సమాధానమిస్తాడు. ఆమెను ఓదార్చి, ఖరుడి సంరక్షణలో దండకారణ్యంలో ఉండేలా ఏర్పాటు చేస్తాడు. వనవాసంలో ఉన్న రామలక్ష్మణులను శూర్పణఖ మోహించడం, వారి చేతిలో పరాభవం చెందడం, పగతో రగిలిపోయిన ఖరుడు దూషణాదులతో రాముడిపై దండెత్తి ప్రాణాలు కోల్పోవడం వాల్మీకి రామాయణంలోని అరణ్యకాండలో మనకు తెలిసిందే.

వాల్మీకి రామాయణంలో లేని మరో ఆసక్తికరమైన వివరాన్ని తదనంతర రామాయణ సంప్రదాయాలు ప్రస్తావిస్తున్నాయి. వెట్టం మణి రచించిన పురాణిక్‌ ఎన్‌సైక్లోపీడియాలో కంబరామాయణం, అరణ్యకాండకు ఆపాదించిన కథనం ప్రకారం, శూర్పణఖకు విద్యుజ్జిహ్వుడి ద్వారా శంభుకుమారుడు అనే కొడుకు జన్మించాడు. దండకారణ్యంలో శివుడి కోసం తపస్సు చేస్తున్న శంభుకుమారుడు, వనవాసంలో ఉన్న ఒక అపురూప సౌందర్యరాశిని చూసి మోహితుడై వృక్షం రూపంలో నిలుస్తాడు. రామలక్ష్మణులు పంచవటిలో పర్ణశాల నిర్మించుకునే సమయంలో లక్ష్మణుడు ఆ చెట్టును నరికివేయడంతో కామాతురుడైన శంభుకుమారుడు మరణిస్తాడు. ఇదీ విద్యుజ్జిహ్వుడి కథ!

– కృష్ణ బాలాజి పల్లపోతు, 99490 98406