మమతల వారధి

సమాజంలో ఏ ఒక్కరూ ఆకలితో అలమటించకూడదు, ఏ కన్నతల్లీ కంటినీరు పెట్టకూడదు. మనుషుల మధ్య పేద-గొప్ప అనే తారతమ్యాలు తొలగిపోయి, అందరూ ఒకే కుటుంబంలా జీవించాలన్నదే సృష్టికర్త భావన. సరిగ్గా ఈ ప్రేమను, కరుణను ఆచరణలో చూపించడమే ఇస్లాం నేర్పే మానవతా సేవ.

సమాజంలో ఏ ఒక్కరూ ఆకలితో అలమటించకూడదు, ఏ కన్నతల్లీ కంటినీరు పెట్టకూడదు. మనుషుల మధ్య పేద-గొప్ప అనే తారతమ్యాలు తొలగిపోయి, అందరూ ఒకే కుటుంబంలా జీవించాలన్నదే సృష్టికర్త భావన. సరిగ్గా ఈ ప్రేమను, కరుణను ఆచరణలో చూపించడమే ఇస్లాం నేర్పే మానవతా సేవ. దానం చేయడం అంటే కేవలం డబ్బు ఇవ్వడం కాదు; ఎదుటివారి కష్టాన్ని మన కష్టంగా భావించి గుండెలకు హత్తుకోవడమే అసలైన ధర్మం. మనం చేసే చిన్న సహాయం కూడా మరొకరి జీవితంలో వెలుగులు నింపుతుందని ఇస్లామిక్‌ బోధనలు ఎంతో హృద్యంగా వివరిస్తాయి.

మానవ సేవ ఎంత గొప్పదో పవిత్ర ఖురాన్‌ గ్రంథం ఎన్నో సందర్భాలలో ఎంతో మృదువుగా, స్పష్టంగా తెలియజేస్తుంది :

ఎవరైతే ఒక నిష్పాపి అయిన మనిషి ప్రాణాన్ని కాపాడుతారో, వారు సమస్త మానవాళి ప్రాణాలను కాపాడినట్లే (సూరా అల్‌-మాయిదా: 32)

మీరు అత్యంత ఇష్టపడే దాన్ని (ఇతరుల కోసం) దానం చేయనంత వరకు మీరు నిజమైన పుణ్యాన్ని పొందలేరు. (సూరా ఆలె-ఇమ్రాన్‌: 92)

ధనవంతులారా! మీ సంపదలో పేదలకు, అనాథలకు, యాచకులకు ఒక హక్కు ఉందనే విషయాన్ని
గుర్తుంచుకోండి.(సూరా అజ్‌-జారియాత్‌: 19)

ఇలాంటి సూత్రాలెన్నో మానవత్వం గొప్పదనాన్ని తెలియజేస్తూ మమతల వారధిని నిర్మించేవే! ప్రేమ, కరుణ, మానవత్వం అనేవి ఏ ఒక్క మతానికో పరిమితమైనవి కావు. తోటి మనిషి బాధలో ఉన్నప్పుడు హృదయం స్పందించడమే నిజమైన మానవత్వం. ఈ రోజే మన చుట్టూ ఉన్నవారికి చిన్న సహాయం చేద్దాం, ఒకరి ఆకలి తీరుద్దాం, ఒకరి కంటినీరు తుడుద్దాం. ప్రేమను పంచుదాం.. బంధాలను నిలబెట్టుకుందాం!

– ముహమ్మద్‌ ముజాహిద్‌ 96406 22076