అనుచితంగా తాకిన వ్యక్తిని.. చితక్కొట్టిన మహిళ

నోయిడా: అనుచితంగా తాకి అసభ్యంగా ప్రవర్తించిన వ్యక్తిని ఒక మహిళ చితకబాదింది. నోయిడాలోని సహారా ప్రాంతంలో ఈ ఘటన జరిగింది. నోయిడాలోని సెక్టార్‌ 12 వద్ద ఉన్న పెట్రోల్‌ బంకులో 24 ఏండ్ల మహిళ ఆరేండ్లుగా పని చేస్తున్నది. శుక్రవారం ఉదయం ఆమె రోడ్డుపై నడిచి డ్యూటీకి వస్తున్నది. ఇంతలో సైకిల్‌ తొక్కుతున్న 40 ఏండ్ల వ్యక్తి ఆమె ముందు భాగాన్ని తాకి పారిపోయేందుకు ప్రయత్నించాడు. 

వెంటనే స్పందించిన ఆ మహిళ అతడి సైకిల్‌ వెంటపడి నిలువరించి పట్టుకున్నది. అనంతరం అతడి చెంప చెళ్లుమనిపించడంతోపాటు దేహశుద్ధి చేసింది. దీంతో అతడు క్షమించమని వేడుకున్నాడు. ఇంతలో అక్కడికి వచ్చిన పోలీసులు ఆమె నుంచి ఫిర్యాదు తీసుకున్నారు. మరోవైపు అక్కడ గుమిగూడిన స్థానికులు తమ మొబైల్స్‌లో ఫోటోలు, వీడియోలు తీసుకున్నారు. 

లోకల్ టు గ్లోబల్.. వార్త ఏదైనా.. అన్నీ ఒకే యాప్లో. నమస్తే తెలంగాణ ఆండ్రాయిడ్ యాప్ డౌన్లోడ్ చేసుకోండి.