హైద‌రాబాద్‌లో మ‌రో ఘోరం.. ప్రేమించ‌ట్లేద‌ని యువ‌తిపై క‌త్తితో దాడి..వీడియో

హైద‌రాబాద్ : హైద‌రాబాద్ న‌గ‌రంలో మ‌రో ఘోరం చోటు చేసుకుంది. ప్రేమ పెళ్లి చేసుకున్నార‌ని మొన్న స‌రూర్‌న‌గ‌ర్‌లో, నిన్న బేగంబ‌జార్‌లో ఇద్ద‌రు యువ‌కుల‌ను హ‌త్య చేసిన ఘ‌ట‌న మ‌రువ‌క ముందే మ‌రో దారుణం వెలుగు చూసింది. త‌న‌ను ప్రేమించ‌ట్లేద‌ని అక్క‌సుతో ప‌ట్ట‌ప‌గ‌లే, న‌డిరోడ్డుపై ఓ యువ‌తిపై యువ‌కుడు క‌త్తితో దాడి చేశాడు. ఈ ఘ‌ట‌న కంచ‌న్‌బాగ్ పోలీసు స్టేష‌న్ ప‌రిధిలో శుక్ర‌వారం మ‌ధ్యాహ్నం చోటు చేసుకుంది.

కంచ‌న్‌బాగ్ పీఎస్ ప‌రిధిలోని ఓ యువ‌తిని హ‌బీబ్ అనే యువ‌కుడు ప్రేమ పేరుతో వేధింపుల‌కు గురి చేస్తున్నాడు. త‌న‌ను ప్రేమించాల‌ని గ‌త కొంత‌కాలం నుంచి ఆమెను వేధిస్తున్నాడు. హ‌బీబ్ ప్రేమ‌ను ఆమె తిర‌స్క‌రిస్తూనే ఉంది. అయితే ఇవాళ మ‌ధ్యాహ్నం కంచ‌న్‌బాగ్ పీఎస్ ప‌రిధిలోని ఒమ‌ర్ హోట‌ల్ వ‌ద్ద యువ‌తి ఒంట‌రిగా న‌డుచుకుంటూ వెళ్తోంది. ఆమె వెనుకాలే వ‌చ్చిన హ‌బీబ్‌.. యువ‌తిని కింద‌కు నెట్టేసి క‌త్తితో విచక్ష‌ణార‌హితంగా పొడిచాడు. మెడ‌, వీపు, ముఖంపై తీవ్ర గాయాల‌య్యాయి. స‌మాచారం అందుకున్న పోలీసులు హుటాహుటిన ఘ‌ట‌నాస్థ‌లికి చేరుకున్నారు. తీవ్ర ర‌క్త‌స్రావంతో బాధ‌ప‌డుతున్న బాధితురాలిని చికిత్స నిమిత్తం ఓవైసీ ఆస్ప‌త్రికి త‌ర‌లించారు. ప్ర‌స్తుతం యువ‌తికి ఐసీయూలో చికిత్స అందిస్తున్నారు. నిందితుడి కోసం పోలీసులు గాలింపు చ‌ర్య‌లు ముమ్మ‌రం చేశారు. ఘ‌ట‌నాస్థ‌లిలో క్లూస్ టీం వివ‌రాల‌ను సేక‌రిస్తోంది.

హైద‌రాబాద్ కంచ‌న్‌బాగ్ పీఎస్ ప‌రిధిలో మ‌హిళ‌పై యువ‌కుడు క‌త్తితో దాడి.. pic.twitter.com/OTEOLNmNlT

— Namasthe Telangana (@ntdailyonline) May 27, 2022