Akhanda | నందమూరి బాలకృష్ణ హీరోగా బోయపాటి శ్రీను తెరకెక్కించిన బ్లాక్ బస్టర్ సినిమా అఖండ. డిసెంబర్ 2 న విడుదలైన ఈ సినిమాకి అద్భుతమైన కలెక్షన్స్ వచ్చాయి. పెద్ద సినిమా విడుదల చేస్తే థియేటర్స్ కు జనాలు వస్తారా రారా అనే అనుమానాలు పూర్తిగా తొలగించిన మొదటి హీరో బాలకృష్ణ. సినిమా విడుదలై నెల రోజులు అవుతున్నా కూడా ఇప్పటికీ వీకెండ్స్ మంచి వసూళ్లు తీసుకొస్తుంది అఖండ. ఇది నిజంగా చాలా మందికి అర్థం కాని చిక్కుప్రశ్న. ఈ రోజుల్లో రెండు వారాలు గడిచిన తర్వాత మూడో వారంలో కలెక్షన్స్ తీసుకురావడం అరుదుగా జరుగుతుంది.
అలాంటిది బాలకృష్ణ సినిమా నాలుగు వారాల తర్వాత కూడా మంచి షేర్ తీసుకొస్తుంది. ఇప్పటికే అఖండ 71 కోట్ల షేర్ వసూలు చేసింది. అందులో తెలంగాణలో ఏకంగా 20 కోట్ల షేర్ ఉంది. బాలకృష్ణ కెరీర్ లోనే మొదటిసారి ఒక సినిమా నైజాంలో 20 కోట్ల మార్కును అందుకుంది. ఇప్పటి వరకు ఈ సినిమా 150 కోట్ల గ్రాస్ వసూలు చేసింది. అయితే ముందుగా కుదుర్చుకున్న ఒప్పందం ప్రకారం జనవరి 2-3 తేదీల్లోనే అఖండ సినిమా ఓటిటిలో విడుదల కావాల్సి ఉంది. కానీ సినిమాకు ఇప్పటికి కూడా మంచి కలెక్షన్స్ వస్తుండడంతో నిర్మాతలు ప్రత్యేకంగా హాట్ స్టార్ డిస్నీ నిర్వాహకులతో మాట్లాడి సంక్రాంతి పండక్కి ఓటీటీ రిలీజ్ ఉండేలా ప్లాన్ చేసినట్లు తెలుస్తోంది.
ఇప్పటికీ మంచి షేర్ వసూలు చేస్తుంది ఈ సినిమా. నాలుగో వారం కూడా మూడు కోట్ల వరకు షేర్ తీసుకొచ్చింది అఖండ. అందుకే సినిమా ఓటిటి రిలీజ్ డేట్ వాయిదా వేయించారు. దీనివల్ల హాట్ స్టార్ బాగానే నష్టపోతుంది. ఈ నష్టాన్ని నిర్మాతలు భరిస్తారా లేదంటే ఓటీటీ సంస్థ భరిస్తుందా అనేది ఆసక్తికరంగా మారింది. ముందుగా కుదుర్చుకున్న ఒప్పందం కంటే పొడగించాలి అంటే నిర్మాతలు కొంత మొత్తం ఓటిటి సంస్థకు తిరిగి చెల్లించాల్సి ఉంటుంది.