Alia Bhatt | కరణ్ జోహార్ బర్త్‌డే పార్టీలో ఆలియా భట్ హాట్ టాపిక్.. రెండోసారి తల్లి కాబోతుందా?

Alia Bhatt | బాలీవుడ్‌లో మరోసారి ఆలియా భట్ ప్రెగ్నెన్సీ వార్తలు చర్చనీయాంశంగా మారాయి. ప్రముఖ దర్శక నిర్మాత కరణ్ జోహార్ పుట్టినరోజు వేడుకల సందర్భంగా నిర్వహించిన ప్రత్యేక పార్టీలో పాల్గొన్న ఆలియా భట్ ఫొటోలు సోషల్ మీడియాలో వైరల్ కావడంతో, ఆమె రెండోసారి గర్భవతి అయి ఉండొచ్చనే ఊహాగానాలు మొదలయ్యాయి.

Alia Bhatt | బాలీవుడ్‌లో మరోసారి ఆలియా భట్ ప్రెగ్నెన్సీ వార్తలు చర్చనీయాంశంగా మారాయి. ప్రముఖ దర్శక నిర్మాత కరణ్ జోహార్ పుట్టినరోజు వేడుకల సందర్భంగా నిర్వహించిన ప్రత్యేక పార్టీలో పాల్గొన్న ఆలియా భట్ ఫొటోలు సోషల్ మీడియాలో వైరల్ కావడంతో, ఆమె రెండోసారి గర్భవతి అయి ఉండొచ్చనే ఊహాగానాలు మొదలయ్యాయి. అయితే ఇప్పటివరకు ఈ వార్తలపై ఎలాంటి అధికారిక ధృవీకరణ రాలేదు. ప్రఖ్యాత ఫ్యాషన్ డిజైనర్ మనీష్ మల్హోత్రా నిర్వహించిన ఈ వేడుకకు బాలీవుడ్‌కు చెందిన పలువురు అగ్రతారలు హాజరయ్యారు. అనంతరం ఆయన సోషల్ మీడియాలో షేర్ చేసిన ఫొటోల్లో ఆలియా భట్ కనిపించిన తీరు నెటిజన్ల దృష్టిని ఆకర్షించింది. ముఖ్యంగా కొన్ని చిత్రాల్లో ఆమె ధరించిన దుస్తులు, నిలబడిన విధానం ఆధారంగా సోషల్ మీడియా వేదికగా పలు ఊహాగానాలు మొదలయ్యాయి. ముఖ్యంగా రెడ్డిట్‌లో పలువురు వినియోగదారులు ఆలియా రెండో బిడ్డకు జన్మనివ్వబోతుందేమోనని చర్చించుకున్నారు.

అయితే ఈ ప్రచారానికి ఇప్పటివరకు ఎలాంటి ఆధారాలు లేవు. ఆలియా భట్, రణ్‌బీర్ కపూర్ లేదా వారి కుటుంబ సభ్యులు ఈ రూమర్లపై స్పందించలేదు. దీంతో ప్రస్తుతం సోషల్ మీడియాలో జరుగుతున్న చర్చలన్నీ కేవలం ఊహాగానాలుగానే భావించాల్సి ఉంది. అధికారిక ప్రకటన వచ్చే వరకు ఈ వార్తల్లో నిజానిజాలు ఏవో చెప్పడం కష్టమే. ఇక ఈ వేడుకలో బాలీవుడ్ ప్రముఖుల సందడి ప్రత్యేక ఆకర్షణగా నిలిచింది. కాజోల్, రాణి ముఖర్జీ, కరీనా కపూర్, కరిష్మా కపూర్, జాన్వీ కపూర్, సారా అలీ ఖాన్, కియారా అద్వానీ, సిద్ధార్థ్ మల్హోత్రా, షనయా కపూర్, జోయా అక్తర్, రణ్‌బీర్ కపూర్, విక్కీ కౌశల్ తదితరులు ఈ కార్యక్రమంలో పాల్గొన్నారు. పార్టీలో తీసిన ఫొటోలు బయటకు రావడంతో అభిమానులు వాటిని విపరీతంగా షేర్ చేస్తున్నారు.

మరోవైపు త్వరలో తెరకెక్కనున్న ‘లవ్ అండ్ వార్’ సినిమా కారణంగా ఆలియా భట్, రణ్‌బీర్ కపూర్, విక్కీ కౌశల్ ఒకే ఫ్రేమ్‌లో కనిపించడం అభిమానులను ఉత్సాహపరిచింది. ఈ ముగ్గురు కలిసి కనిపించిన ఫొటోలు ప్రస్తుతం సోషల్ మీడియాలో వైరల్ అవుతున్నాయి.అలాగే ఒకప్పుడు ప్రేమలో ఉన్నారని వార్తల్లో నిలిచిన ఆలియా భట్, సిద్ధార్థ్ మల్హోత్రా ఇద్దరూ ఒకే వేడుకకు హాజరైనప్పటికీ, కలిసి ఫొటోలు దిగకపోవడం కూడా నెటిజన్ల దృష్టిని ఆకర్షించింది. దీనిపై కూడా సోషల్ మీడియాలో పలు చర్చలు సాగుతున్నాయి. ఇంకా ఈ పార్టీకి కత్రినా కైఫ్ హాజరు కాకపోవడం మరో చర్చకు దారితీసింది. అయితే ఆమె భర్త విక్కీ కౌశల్ మాత్రం రణ్‌బీర్ కపూర్‌తో కలిసి ఫొటోలకు పోజులివ్వడం సోషల్ మీడియాలో హాట్ టాపిక్‌గా మారింది. గత సంబంధాలను గుర్తుచేస్తూ నెటిజన్లు ఈ ఫొటోలపై తమదైన శైలిలో కామెంట్లు చేస్తున్నారు.