Vikram: మ‌రో ప్ర‌యోగానికి సిద్ధ‌మైన విక్ర‌మ్.. ఆసక్తిగా గ‌మ‌నిస్తున్న ఫ్యాన్స్

కొంద‌రు హీరోలు సినిమా హిట్టా, ఫ‌ట్టా అనేది ఆలోచించ‌కుండా త‌మ న‌ట‌న‌తో ప్రేక్ష‌కుల‌ని ఎంట‌ర్‌టైన్ చేయాల‌ని భావిస్తుంటారు. క‌థ ఎలా ఉన్నా పాత్ర‌పైనే ఎక్కువ‌గా దృష్టి సారిస్తూ అభిమానుల ప్ర‌శంస‌లు పొందుతూ ఉంటారు. అలాంటి వారిలో చియాన్ విక్ర‌మ్ ఒక‌రు. ఆయ‌న న‌టించిన ప్ర‌తి సినిమాలోను వైవిధ్యాన్ని చూపించి అల‌రించారు.

కెరీర్ మొద‌ట్లో ‘సేతు’, ‘సామి’ లాంటి హిట్స్ తన ఖాతాలో వేసుకున్న విక్ర‌మ్… ‘అపరిచితుడు’ హిట్‌తో అంద‌రి దృష్టిని ఆకర్షించాడు. ఈ సినిమాతోనే అతని ఇమేజ్ ఒక్కసారిగా మారిపోయింది. ఒక్కసారి ఫేమ్ వచ్చాక ప్రయోగాలకే ప్రాధాన్యత ఇచ్చాడు విక్రమ్. ప్రతి సినిమాలో రకరకాల వేరియేషన్స్ చూపిస్తాడు. అయితే ఈ ప్రయోగాలన్నీ నటుడిగా తనని మరిన్ని మెట్లు ఎక్కిస్తున్నాయి తప్ప కమర్షియల్‌గా మాత్రం నిరాశపరుస్తున్నాయి.

ప్రస్తుతం ధృవనక్షత్రం, కోబ్రా, మహాన్, పొన్నియిన్ సెల్వన్, మహావీర్ కర్ణ చిత్రాలు చిత్రాలు చేస్తున్నాడు విక్రమ్. ఇవింకా సెట్స్‌పై ఉండగానే మరో సినిమాకి కమిటయ్యాడు. ర‌జనీకాంత్‌తో కాలా, క‌బాలి అనే సినిమాలు చేసిన పా రంజిత్ ద‌ర్శ‌క‌త్వంలో ఈ సినిమా రూపొంద‌నుంది. విక్రమ్‌కి ఇది అరవై ఒకటో సినిమా. కె.జ్ఞానవేల్ రాజా నిర్మించనున్నాడు. పూర్తి వివరాలు తెలియాల్సి ఉంది. అయితే టేకింగ్ స్టైల్‌ బాగున్నా కాన్సెప్టులు సరిగ్గా లేకపోవడమే రంజిత్‌ ఫెయిల్యూర్‌‌కి కారణమని అందరూ చెబుతారు. మ‌రి త‌ప్పొప్పులు స‌రి చేసుకొని విక్ర‌మ్ తో హిట్ కొడ‌తాడా అనేది చూడాలి.