కొత్త ప్రపంచాన్ని సృష్టించాం!

ట్రెండ్‌కు భిన్నంగా నవీన ఆలోచనలతో, మానవ వ్యక్తిత్వపు లోతుల్ని ఆవిష్కరిస్తూ సినిమాలు తీస్తుంటారు కన్నడ నటుడు, దర్శకుడు ఉపేంద్ర. ఇప్పటివరకు ఆయన డైరెక్ట్‌ చేసిన చిత్రాలను పరిశీలిస్తే ఆ విషయం అవగతమవుతుంది.

ట్రెండ్‌కు భిన్నంగా నవీన ఆలోచనలతో, మానవ వ్యక్తిత్వపు లోతుల్ని ఆవిష్కరిస్తూ సినిమాలు తీస్తుంటారు కన్నడ నటుడు, దర్శకుడు ఉపేంద్ర. ఇప్పటివరకు ఆయన డైరెక్ట్‌ చేసిన చిత్రాలను పరిశీలిస్తే ఆ విషయం అవగతమవుతుంది. తాజాగా ఆయన ‘యుఐ’ అంటూ ఫ్యూచరిస్టిక్‌ కాన్సెప్ట్‌తో ప్రేక్షకుల ముందుకురాబోతున్నారు. స్వీయ దర్శకత్వంలో ఆయన నటించిన ఈ చిత్రం ఈ నెల 20న విడుదల కానుంది. ఈ సందర్భంగా శనివారం హీరో ఉపేంద్ర పాత్రికేయులతో మాట్లాడుతూ పంచుకున్న విశేషాలు..

• మన విద్యా వ్యవస్థలో చాలా లోపాలున్నాయి. చిన్నప్పుడు టీచర్లు ఏం చెబితే దానిని కంఠస్తం చేసేవాళ్లం కానీ లాజికల్‌ థింకింగ్‌ ఉండేది కాదు. ఏ ఫర్‌ ఆపిల్‌ అని కాకుండా..దానికి మరికొన్ని ఆక్షరాలు జత చేసి చెప్పమంటే మన ఆలోచనలు మరోలా ఉండేవి. నా కథల్లో కూడా అలా కొత్త విషయాలను చెప్పే ప్రయత్నం చేస్తుంటా.
• ఈ సినిమా కథ రివీల్‌ చేయడం ఇష్టం లేదు. ఈ సినిమాలోని ప్రతీ విషయంతో ప్రేక్షకులు రిలేట్‌ అవుతారు. నేను చూపించిన అంశాల్ని డీకోడ్‌ చేసే ప్రయత్నం చేస్తారు. సమాజంలో చోటు చేసుకుంటున్న వివిధ సంఘటనలను ప్రతీకలుగా తీసుకొని ఈ కాన్సెప్ట్‌ను సిద్ధం చేశా.
• నా సినిమాల్లో చెప్పాలనుకున్న విషయాల్ని ఎలాంటి సంకోచం లేకుండా వ్యక్త పరుస్తాను. కొత్త మార్గాల్ని
  అన్వేషించాలన్నదే నా సిద్ధాంతం. ఎలాంటి లెక్కలు వేసుకోకుండా గట్‌ ఫీలింగ్‌తో సినిమాలు తీస్తా (నవ్వుతూ).
• మనం ఎక్కువగా సమస్యల మీదనే మాట్లాడతాం కానీ వాటి పరిష్కారం గురించి పెద్దగా పట్టించుకోం. ఎందుకంటే సొల్యూషన్‌ కనిపెట్టడం చాలా కష్టమైన పని. నా సినిమాల ద్వారా సొల్యూషన్స్‌ గురించి ఆలోచించమని చెబుతుంటాను.
• సినిమాల ద్వారా సందేశం
  అందించాలని ఎప్పుడూ అనుకోలేదు. ప్రేక్షకులను మారమని చెప్పడానికి నేనెవరిని ? నేను సందేశాలివ్వను, తీసుకోను కూడా.