అంచనాలు నిజమయ్యాయి

“ది వారియర్‌’ చిత్రానికి అద్భుతమైన ఆదరణ లభిస్తున్నది. సంధ్య థియేటర్‌లో ప్రేక్షకుల మధ్య ఫస్ట్‌షో చూశా. రామ్‌ క్రేజ్‌ ఎలాంటిదో అర్థమయింది. తమిళంలో కూడా ఈ సినిమాకు మంచి రెస్పాన్స్‌ లభిస్తున్నది. ఇదే ఉత్సాహంతో భవిష్యత్తులో మరిన్ని స్ట్రెయిట్‌ తెలుగు చిత్రాలు చేస్తాను’ అన్నారు లింగుస్వామి. ఆయన దర్శకత్వంలో రామ్‌, కృతిశెట్టి జంటగా శ్రీనివాసా చిట్టూరి నిర్మించిన ‘ది వారియర్‌’ చిత్రం ఇటీవలే విడుదలైంది. ఈ సందర్భంగా శనివారం సక్సెస్‌మీట్‌ను నిర్వహించారు. రామ్‌ మాట్లాడుతూ ‘విడుదలైన సమయంలో వర్షాల వల్ల ఎన్నో అడ్డంకులు వచ్చినా మా టీమ్‌ అంతా వారియర్స్‌లా నిలబడ్డారు. ప్రతికూల పరిస్థితుల్లో తెలుగు ప్రేక్షకులు థియేటర్లకు వస్తున్నారు. ఈ సినిమా విషయంలో మా అంచనాలన్నీ నిజమయ్యాయి. ఇదే బ్యానర్‌లో నా తదుపరి చిత్రాన్ని చేస్తున్నా’ అన్నారు. ‘వర్షాల్లో కూడా మంచి ఓపెనింగ్స్‌ లభిస్తున్నాయి. ప్రేక్షకులు కోరుకునే కమర్షియల్‌ అంశాలన్నీ ఈ సినిమాలో ఉన్నాయి. నేను పోషించిన గురు పాత్రకు మంచి స్పందన లభిస్తున్నది’ అని ఆది పినిశెట్టి తెలిపారు. ఈ కార్యక్రమంలో చిత్ర యూనిట్‌ సభ్యులందరూ పాల్గొన్నారు.