అత్యాచారం ఆరోప‌ణ‌లు అవాస్త‌వం: టీ సిరీస్‌

ప్రముఖ ఆడియో కంపెనీ, మ్యూజిక్‌ ప్రొడక్షన్‌ హౌస్‌ టీ సిరీస్‌ ఎండీ భూషణ్‌ కుమార్‌పై అత్యాచార ఆరోప‌ణ‌లు వ‌చ్చిన సంగ‌తి తెలిసిందే. కంపెనీలో ప‌ని ఇస్తాన‌ని చెప్పి మూడేళ్లు అత్యాచారం చేశాడ‌ని, అలానే వేధింపుల‌కు గురి చేశాడ‌ని పోలీసులకి ఫిర్యాదు చేసింది. అయితే ఈ వార్త సోష‌ల్ మీడియాలో వైర‌ల్ కావ‌డంతో వాటిని టీసిరీస్ తోసిపుచ్చింది. త‌మ వ‌ద్ద ఆధారాలు కూడా ఉన్నాయంటూ ప్ర‌క‌ట‌న విడుద‌ల చేసింది.

భూష‌ణ్ కుమార్‌పై వ‌చ్చిన ఆరోప‌ణ‌ల‌లో వాస్తవం లేదు. ఆమె గ‌తంలో సినిమా, మ్యూజిక్ వీడియోల కోసం టీసిరీస్ బ్యాన‌ర్‌లో ప‌ని చేసింది. మార్చిలో వెబ్ సిరీస్ చేయాల‌నుకున్న ఆ మ‌హిళ ఆర్ధిక సాయం కోసం భూష‌ణ్ కుమార్‌ని సంప్ర‌దించింది. ఆమె విన్న‌పాన్ని సున్నితంగా తిర‌స్క‌రించాడు. జూన్‌లో మరోసారి ఎక్కువ మొత్తం డ‌బ్బులు డిమాండ్ చేస్తూ మరోసారి టీ సిరీస్‌ బ్యానర్‌ను సంప్రదించింది. వారు తిర‌స్క‌రించ‌డంతో దోపికిడి సైతం ప్ర‌య‌త్నించింది. జూలై 1న ఆమెపై అంబోలి పోలీస్ స్టేష‌న్ లో ఫిర్యాదు చేశాం. మా ద‌గ్గ‌ర ఆడియో క్లిప్పింగ్స్ కూడా ఉన్నాయి. ఆ దోపిడీ కేసుకు కౌంటర్‌గా ఆమె ఈ ఫిర్యాదు చేసిందే తప్ప అంతకు మంచి మరొకటి కాదు. న్యాయ‌ప‌ర‌మైన చర్య‌లు తీసుకుంటాం అని లేఖ‌లో పేర్కొంది టీ సిరీస్.