సురవరం జీవితం నేటి తరానికి ఆదర్శం

తెలంగాణ వైతాళికుడు, ప్రముఖ స్వాతంత్య్ర సమరయోధుడు సురవరం ప్రతాప్‌రెడ్డి జీవితంపై సురవరం ప్రతాప్‌రెడ్డి సాహితీ వైజయంతి ట్రస్ట్‌ తీసిన ‘ సురవరం’ బయోపిక్‌ సినిమా ప్రివ్యూ ప్రదర్శన మంగళవారం సాయంత్రం బంజారాహిల్స్‌లోని ప్రసాద్‌ ఫిల్మ్‌ ల్యాబ్స్‌లో నిర్వహించారు.

తెలంగాణ వైతాళికుడు, ప్రముఖ స్వాతంత్య్ర సమరయోధుడు సురవరం ప్రతాప్‌రెడ్డి జీవితంపై సురవరం ప్రతాప్‌రెడ్డి సాహితీ వైజయంతి ట్రస్ట్‌ తీసిన ‘ సురవరం’ బయోపిక్‌ సినిమా ప్రివ్యూ ప్రదర్శన మంగళవారం సాయంత్రం బంజారాహిల్స్‌లోని ప్రసాద్‌ ఫిల్మ్‌ ల్యాబ్స్‌లో నిర్వహించారు. మాజీ మంత్రి బీఆర్‌ఎస్‌ సీనియర్‌ నేత వి.శ్రీనివాస్‌గౌడ్‌, దర్శకులు శేఖర్‌ కమ్ముల, తెలంగాణ సారస్వత పరిషత్‌ అధ్యక్షుడు, ఆచార్య ఎల్లూరి శివారెడ్డి, ట్రస్ట్‌ ఉపాధ్యక్షుడు కొండా లక్ష్మీకాంత్‌రెడ్డి, సన్‌షైన్‌ హాస్పిటల్స్‌ డైరెక్టర్‌ డా. గురవారెడ్డితో పాటు పలువురు ప్రముఖులు ఈ సినిమాను తిలకించారు.

అనంతరం ఏర్పాటు చేసిన సమావేశంలో మాజీ మంత్రి శ్రీనివాస్‌గౌడ్‌ మాట్లాడుతూ..నిజాం నిరంకుశపాలనలో తెలంగాణ ప్రజల దీనస్థితికి స్పందించిన సురవరం ప్రతాప్‌రెడ్డి సమాజాన్ని తన రచనల ద్వారా జాగృతం చేయడంతో పాటు పోరాటాన్ని నడిపించారన్నారు. నేటి తరానికి ఇలాంటి సినిమాలు స్పూర్తిని కలిగిస్తాయన్నారు. దర్శకుడు శేఖర్‌ కమ్ముల మాట్లాడుతూ.. నిజాం కాలంలో హైదరాబాద్‌ సంస్థానంలో మాతృభాష తెలుగులో చదువుకునే పరిస్థితి సైతం ఉండేది కాదని, అలాంటి పరిస్థితిలో సురవరం తెలుగు భాష కోసం చేసిన కృషి చరిత్ర ఎన్నటికీ మరువదన్నారు. ఈ కార్యక్రమంలో సురవరం చిత్ర దర్శకుడు బీఎమ్‌.రెడ్డి, హర్షవర్దన్‌రాయల్‌, విజయప్రసాద్‌, సురవరం కుటుంబసభ్యులు డా.సురవరం కృష్ణవర్ధన్‌రెడ్డి, అనిల్‌కుమార్‌రెడ్డి, కపిల్‌, గిరిధర్‌రెడ్డి తదితరులు పాల్గొన్నారు.