స్నేహితులే హేళన చేశారు!

శారీరక రూపాన్ని చూసి హేళన చేయడం (బాడీషేమింగ్‌) సమాజంలో ఓ రుగ్మతగా పాతుకుపోయిందని, మహిళలు ఆత్మవిశ్వాసంతో అలాంటి అవమానాల మీద పోరాటం చేయాలని పిలుపునిచ్చింది అగ్ర కథానాయిక సోనాక్షిసిన్హా. , కాలేజీ రోజుల్లో తాను అధిక బరువు సమస్యతో బాధపడ్డానని..లావుగా ఉన్నావంటూ దగ్గరి మిత్రులే కామెంట్స్‌ చేయడం బాధించేదని చెప్పింది. అయితే ఎంచుకున్న రంగంలో అగ్రగామిగా ఎదగాలనే సంకల్పంతో ప్రయాణాన్ని సాగించానని పేర్కొంది. ఆమె మాట్లాడుతూ ‘నేను ఫ్యాషన్‌ స్కూల్‌లో కోర్స్‌ చేస్తున్నప్పుడు కూడా నా శారీరక రూపాన్ని చూసి హేళన చేసేవారు. ఇంత లావు శరీరంతో కథానాయికగా ఎలా రాణిస్తావని అవమానంగా మాట్లాడేవారు. అయితే అలాంటి నెగెటివ్‌ మనస్తత్వం ఉన్న వారిని దూరం పెట్టాను. నాకు నచ్చినట్లుగా ఉంటూ సినీ ప్రయత్నాలు ప్రారంభించాను. కాస్త బొద్దుగా ఉండి కూడా సినీరంగంలో సత్తా చాటిన వారి జీవితాల్ని స్ఫూర్తిగా తీసుకున్నా. నాడు విమర్శలు చేసిన వారే ఇప్పుడు నన్ను ఒక సెలబ్రిటీగా గౌరవిస్తున్నారు. అందుకే మహిళలు తమ రూపాన్ని చూసుకొని ఆత్మన్యూనతా భావానికి లోనుకావొద్దు’ అని చెప్పింది.