Scene Review | ‘సీన్’ సినిమా రివ్యూ.. సూర్య కొత్త సినిమా ఎలా ఉందంటే!

Scene Movie Review | ఒక పోలీస్ ఆఫీసర్‌కు చూపు మందగిస్తే, అతడి కెరీర్ ముగిసినట్లే అనుకోవడం సహజం. కానీ, ఆ అంధకారమే ఒక కేసును ఛేదించడానికి ప్రధాన ఆయుధంగా మారితే ఎలా ఉంటుంది? సరిగ్గా ఈ వినూత్న ఆలోచనతో తెరకెక్కిన విభిన్నమైన క్రైమ్ కామెడీ థ్రిల్లరే ‘సీన్’.

ఒక పోలీస్ ఆఫీసర్‌కు చూపు మందగిస్తే, అతడి కెరీర్ ముగిసినట్లే అనుకోవడం సహజం. కానీ, ఆ అంధకారమే ఒక కేసును ఛేదించడానికి ప్రధాన ఆయుధంగా మారితే ఎలా ఉంటుంది? సరిగ్గా ఈ వినూత్న ఆలోచనతో తెరకెక్కిన విభిన్నమైన క్రైమ్ కామెడీ థ్రిల్లరే ‘సీన్’. త‌మిళ స్టార్ న‌టుడు సూర్య ప్రధాన పాత్రలో నటించ‌గా, నస్లెన్, నజ్రియా కీలక పాత్రల్లో కనిపించారు. ‘ఆవేశం’, ‘రోమాంచం’ చిత్రాలతో తనకంటూ ప్రత్యేక గుర్తింపు తెచ్చుకున్న జీతు మాధవన్ దర్శకత్వంలో వచ్చిన ఈ సినిమా ప్రేక్షకులను ఏమేరకు మెప్పించిందో ఇప్పుడు సమీక్షలో చూద్దాం.

కథ
డీఎస్పీ ప్రేమ్ రాజ్ (సూర్య) కంటి చూపు సమస్యతో బాధపడుతూ రిటైర్మెంట్ తీసుకోవాలని భావిస్తాడు. సరిగ్గా అదే సమయంలో నగరంలో జరిగే ఊహించని హత్యలు అతడిని మళ్లీ విధుల్లోకి లాగుతాయి. చూపు పూర్తిగా మందగించినప్పటికీ, తన జ్ఞాపకశక్తి, అనుభవంతో పాటు తన కళ్లుగా నిలిచే మాయ (నజ్రియా) సహాయంతో ఈ కేసును దర్యాప్తు చేయడం ప్రారంభిస్తాడు. మరోవైపు, ఈ కేసుల వెనుక ఉన్న విచిత్రమైన, ప్రమాదకరమైన సీరియల్ కిల్లర్ ఈశ్వరన్ (నస్లెన్) చేసే మైండ్ గేమ్స్ కథను వేరే లెవెల్‌కు తీసుకెళ్తాయి. ప్రేమ్ రాజ్ – ఈశ్వరన్ మధ్య జరిగే ఈ మైండ్ గేమ్‌లో ఎవరు గెలిచారు? అసలు కిల్లర్ ఉద్దేశం ఏమిటి? అనేదే అసలు కథ.

నటీనటులు
తన స్టార్‌డమ్‌ను పక్కనపెట్టి, ఒక విభిన్నమైన మరియు సవాల్‌తో కూడిన డీఎస్పీ ప్రేమ్ రాజ్ పాత్రలో సూర్య ఒదిగిపోయారు. చూపు లేని వ్యక్తిగా ఆయన పడే ఇబ్బందులు, వాటిని అధిగమించే తీరులో ఆయన నటన అద్భుతంగా ఉంది. ముఖ్యంగా ఆయన చెప్పే డైలాగ్స్, కామెడీ టైమింగ్ సినిమాకు పెద్ద ఎస్సెట్. సీరియల్ కిల్లర్ ఈశ్వరన్ పాత్రలో నస్లెన్ నటన చాలా సర్ప్రైజింగ్‌గా ఉంది. పైకి అమాయకంగా కనిపిస్తూనే, లోపల చేసే వికృత చేష్టలతో ప్రేక్షకులను భయపెడతాడు, నవ్విస్తాడు. ప్రేమ్ రాజ్‌కు తోడుగా నిలిచే మాయ పాత్రలో నజ్రియా తన సహజమైన నటనతో ఆకట్టుకున్నారు. సూర్య – నజ్రియా కాంబినేషన్ సన్నివేశాలు బాగున్నాయి. మిగతా నటీనటులు తమ పరిధి మేరకు చక్కటి నటనను కనబరిచారు.

సాంకేతికంగా
దర్శకుడు జీతు మాధవన్ మరోసారి తన సృజనాత్మకతను చాటుకున్నారు. సాధారణంగా సీరియస్‌గా ఉండే క్రైమ్ థ్రిల్లర్ జోనర్‌ను ఎంచుకుని, అందులో డార్క్ కామెడీని మిళితం చేసిన విధానం అద్భుతంగా ఉంది. తొలిభాగంలో వచ్చే సన్నివేశాలు, ఉత్కంఠభరితమైన మలుపులు ప్రేక్షకులను సీట్లకు కట్టేస్తాయి. ఇళయరాజా సంగీతం సినిమా మూడ్‌ను మరింత ఎలివేట్ చేసింది. నేపధ్య సంగీతం, కెమెరా పనితీరు (చూపు లేని వ్యక్తి కోణంలో కెమెరాను చూపించిన విధానం) సినిమా స్థాయిని పెంచాయి. ఎడిటింగ్ ఇంకాస్త క్రిస్పీగా ఉంటే బాగుండేది.

ప్లస్ పాయింట్లు 
సూర్య, నస్లెన్ నటన
విభిన్నమైన క్రైమ్ కామెడీ థ్రిల్లర్ జోనర్.
కామెడీ టైమింగ్, గ్రిప్పింగ్ స్క్రీన్ ప్లే.
దర్శకుడు జీతు మాధవన్ టేకింగ్, విజువల్స్.

మైనస్ పాయింట్లు
సెకండాఫ్‌
లీడ్ జోడీ మధ్య రొమాంటింగ్ ట్రాక్ ఇంకా బలపడి ఉండాల్సింది.

చివ‌రిగా.. ‘సీన్’ అనేది కేవలం ఒక సాధారణ పోలీస్ ఇన్వెస్టిగేషన్ సినిమా మాత్రమే కాదు; ఇది నవ్విస్తూనే ఉత్కంఠకు గురిచేసే ఒక కొత్త అనుభూతి. కొన్ని కథనపరమైన లోపాలు మినహాయిస్తే, సూర్య అద్భుతమైన నటన, జీతు మాధవన్ మార్క్ డైరెక్షన్ కోసం ఈ చిత్రాన్ని నిరభ్యంతరంగా చూడవచ్చు. క్రైమ్ థ్రిల్లర్స్‌లో కొత్తదనాన్ని కోరుకునే వారికి ఇది మంచి ఛాయిస్.

రేటింగ్ : 2.75/5