Visit:
Salaar Movie | సరిగ్గా నలభై రోజుల్లో రిలీజ్ కాబోతున్న సలార్‌పై ప్రభాస్ ఫ్యాన్స్‌లో మాములు అంచనాల్లేవు. పక్కా రికార్డులు కొల్లగొడుందని దీమాగా ఉన్నారు. ఇప్పటికే రిలీజైన టీజర్‌కు తిరుగులేని రెస్పాన్స్‌ వచ్చింది. ప్రభాస్ ఫ్యాన్స్ కు ఆదిపురుష్ చేసిన గాయానికి అసలు సిసలైన మందు సలారే. జూలై 6న కోడికూత వినకముందే సలార్ ఊచకోతను చూపించి ప్రభాస్ అభిమానులను ఆనందపు అంచుల్లో నిలబెట్టాడు ప్రశాంత్‌ నీల్‌. జురాసిక్‌ పార్కులో డైనోసర్‌ ముందు ఏదైనా దిగదుడుపే అన్న రేంజ్‌లో ప్రభాస్‌కు ఎలివేషన్‌ ఇవ్వడం వేరే లెవల్‌. ఒక్క టీజర్‌తో యావత్‌ సినీ అభిమానుల్లో తిరుగులేని అంచనాలు క్రియేట్‌ అయ్యాయి. ఇక వచ్చే నెలలో ట్రైలర్ కూడా రిలీజ్ కాబోతుందని అప్పుడే ప్రకటన కూడా ఇచ్చేశారు.
ఇదిలా ఉంటే ఈ సినిమాకు సంబంధించిన ఓ అప్‌డేట్‌ నెట్టింట తెగ వైరల్‌ అవుతుంది. ఈ సినిమాలో వెయ్యి మందితో ప్రభాస్ తలపడే ఫైట్‌ సీన్‌ ఉండబోతుందట. ఇందులో కొత్తేముంది అనుకుంటున్నారా? ఇక్కడ మరో ట్విస్ట్‌ ఏంటంటే.. వెయ్యి మంది విలన్‌లు ప్రభాస్ వెంట పడుతుంటే.. మరో ప్రభాస్ వచ్చి వాళ్లందరి అంతుచూస్తాడట. ఈ సినిమాలో ప్రభాస్ ద్విపాత్రాభినయం చేస్తున్నాడని ఎప్పటినుంచో వినిపిస్తున్న ప్రచారమే. ఇక నిజంగా ఈ సీన్‌ ఉండబోతుందా లేదా అనేది తెలియదు కానీ.. ఒకవేళ ఉంటే మాత్రం థియేటర్‌లు దద్దరిల్లడం ఖాయం. బయటకు వినిపంచట్లేదు కానీ లోలోపల భారీ మొత్తంలో ఈ సినిమాకు బిజినెస్ జరుగుతుందట. ఒక్క తెలుగు రాష్ట్రాల్లోనే సలార్ బిజినెస్ లెక్కలు రెండొందల కోట్లు దాటుతున్నాయని ఇన్ సైడ్ టాక్.
రెండు భాగాలుగా తెరకెక్కుతున్న సలార్ సినిమా ఫస్ట్ పార్ట్ సెప్టెంబర్ 28న ప్రేక్షకుల ముందుకు రానుంది. సలార్ సినిమాను ఇంగ్లీష్‌ భాషలోనూ రిలీజ్ చేసేలా గట్టి ప్రయత్నాలే చేస్తుందట హోంబలే సంస్థ. అంతేకాకుండా విెదేశాల్లో పెద్ద ఎత్తున ఈ సినిమా రిలీజ్‌ను ప్లాన్‌ చేస్తున్నారట. ప్రశాంత్‌ నీల్‌ దర్శకత్వం వహించిన ఈ సినిమా ప్రస్తుతం ప్యాచ్‌ వర్క్‌ను పూర్తి చేసుకుంటుంది. బిగ్గెస్ట్ యాక్షన్ ఎంటర్టైనర్ గా తెరకెక్కిన ఈ సినిమాలో ప్రభాస్ కు జోడీగా శృతిహాసన్ నటిస్తుంది. మలయాళ నటుడు పృథ్విరాజ్ సుకుమారన్ ప్రతినాయకుడిగా కనిపించబోతున్నాడు.
