శంక‌ర్‌తో ర‌ణ్‌వీర్‌.. అప‌రిచితుడు హిందీ రీమేక్‌

April 14, 2021 / 12:00 PM IST

బ్లాక్‌బ‌స్ట‌ర్ మూవీ అప‌రిచితుడు హిందీలో రీమేక్ కాబోతోంది. లెజెండ‌రీ డైరెక్ట‌ర్ శంక‌రే హిందీలోనూ దీనికి ద‌ర్శ‌క‌త్వం వ‌హిస్తున్నాడు. ఇందులో ర‌ణ్‌వీర్ సింగ్ లీడ్ రోల్ ప్లే చేస్తుండ‌టం విశేషం. ఈ విష‌యాన్ని ర‌ణ్‌వీరే ఇన్‌స్టాలో ప్ర‌క‌టించాడు. శంక‌ర్‌తోపాటు ప్రొడ్యూస‌ర్ జ‌యంతిలాల్‌తో క‌లిసి ఉన్న ఫొటోను ర‌ణ్‌వీర్ ఈ సంద‌ర్భంగా షేర్ చేశాడు. ఇండియ‌న్ సినిమా మార్గ‌ద‌ర్శ‌కుడితో చేతులు క‌లుపుతున్నాన‌ని ప్ర‌క‌టిస్తున్నందుకు చాలా గ‌ర్వంగా ఉందంటూ అత‌డు కామెంట్ చేశాడు.

అద్భుత‌మైన సినిమాటిక్ విజ‌న్ ఉన్న శంక‌ర్ స‌ర్‌తో మూవీ చేస్తుండ‌టం త‌న అదృష్ట‌మ‌ని ఈ సంద‌ర్భంగా ర‌ణ్‌వీర్ అన్నాడు. ఎప్ప‌టికైనా ఆయ‌న‌తో మూవీ చేయాల‌ని తాను భావించేవాడిన‌ని, అప‌రిచితుడులాంటి మూవీలో లీడ్ రోల్ అంటే త‌న క‌ల నిజ‌మైన‌‌ట్లే అని అత‌డు అన‌డం విశేషం. అన్నియ‌న్ పేరుతో త‌మిళ్‌లో వ‌చ్చిన ఈ మూవీ అప‌రిచితుడుగా తెలుగు డ‌బ్ అయింది. ఈ మూవీలో స్ల్పిట్ ప‌ర్స‌నాలిటీతో మూడు డిఫ‌రెంట్ షేడ్స్‌లో విక్ర‌మ్ చేసిన యాక్టింగ్ అద్భుత‌మ‌నే చెప్పాలి.