Rajamouli | ‘వారణాసి’ తర్వాత జక్కన్న ప్లాన్ ఏంటి?.. సూర్యతో భారీ సినిమానా లేక చిన్న ప్రాజెక్టా…!

Rajamouli | దర్శకధీరుడు ఎస్.ఎస్. రాజమౌళి ప్రతి సినిమాతో సినిమా స్థాయిని మరింత ఎత్తుకు తీసుకెళ్తూ తనదైన ముద్ర వేస్తున్నారు. ‘బాహుబలి’, ‘ఆర్‌ఆర్‌ఆర్’ వంటి చిత్రాలతో ప్రపంచవ్యాప్తంగా గుర్తింపు తెచ్చుకున్న ఆయన ప్రస్తుతం సూపర్ స్టార్ మహేష్ బాబు హీరోగా తెరకెక్కిస్తున్న భారీ అడ్వెంచర్ యాక్షన్ చిత్రం ‘వారణాసి’తో బిజీగా ఉన్నారు.

Rajamouli | దర్శకధీరుడు ఎస్.ఎస్. రాజమౌళి ప్రతి సినిమాతో సినిమా స్థాయిని మరింత ఎత్తుకు తీసుకెళ్తూ తనదైన ముద్ర వేస్తున్నారు. ‘బాహుబలి’, ‘ఆర్‌ఆర్‌ఆర్’ వంటి చిత్రాలతో ప్రపంచవ్యాప్తంగా గుర్తింపు తెచ్చుకున్న ఆయన ప్రస్తుతం సూపర్ స్టార్ మహేష్ బాబు హీరోగా తెరకెక్కిస్తున్న భారీ అడ్వెంచర్ యాక్షన్ చిత్రం ‘వారణాసి’తో బిజీగా ఉన్నారు. అత్యంత భారీ బడ్జెట్‌తో రూపొందుతున్న ఈ గ్లోబల్ ప్రాజెక్ట్‌పై దేశ విదేశాల్లో భారీ అంచనాలు నెలకొన్నాయి. ఈ చిత్రంలో ప్రియాంక చోప్రా కథానాయికగా నటిస్తుండగా, పృథ్వీరాజ్ సుకుమారన్ కీలక ప్రతినాయక పాత్రలో కనిపించనున్నారు. ఆస్కార్ విజేత ఎం.ఎం. కీరవాణి సంగీతం అందిస్తున్న ఈ విజువల్ వండర్‌ను 2027 ఏప్రిల్ 7న ప్రపంచవ్యాప్తంగా విడుదల చేయాలని చిత్ర బృందం ప్రణాళికలు సిద్ధం చేస్తోంది.

ఒకవైపు ‘వారణాసి’ షూటింగ్ చివరి దశకు చేరుకుంటుండగా, మరోవైపు రాజమౌళి తదుపరి సినిమా ఎవరితో ఉండబోతోందన్న చర్చ సినీ వర్గాల్లో హాట్ టాపిక్‌గా మారింది. ముఖ్యంగా తమిళ స్టార్ హీరో సూర్యతో రాజమౌళి సినిమా చేయనున్నారనే ప్రచారం మరోసారి ఊపందుకుంది. ఇద్దరి కాంబినేషన్‌పై గతంలో కూడా ఎన్నోసార్లు వార్తలు వచ్చాయి. ఆసక్తికరంగా, ఒకప్పుడు ‘మగధీర’ కథను తొలుత సూర్యకు వినిపించారనే విషయం అప్పట్లో చర్చనీయాంశమైంది. అయితే వివిధ కారణాల వల్ల ఆ ప్రాజెక్ట్ కార్యరూపం దాల్చలేదు. అనంతరం ఆ సినిమా రామ్ చరణ్‌తో తెరకెక్కి ఇండస్ట్రీ హిట్‌గా నిలిచింది. సూర్య కూడా గతంలో పలుమార్లు రాజమౌళితో సినిమా చేయాలనే కోరికను వ్యక్తం చేశారు. భవిష్యత్తులో తప్పకుండా కలిసి పనిచేస్తామని ఆయన చెప్పిన వ్యాఖ్యలు అభిమానుల్లో ఇప్పటికీ ఆసక్తిని కొనసాగిస్తున్నాయి. తాజాగా వీరిద్దరి మధ్య కథా చర్చలు జరిగాయనే ప్రచారం వినిపిస్తున్నప్పటికీ, దీనిపై అధికారిక ప్రకటన మాత్రం ఇంకా వెలువడలేదు.

రాజమౌళి కెరీర్‌ను పరిశీలిస్తే, ప్రతి సినిమాతో స్కేల్‌ను పెంచుకుంటూ ముందుకు సాగుతున్న విషయం తెలిసిందే. అలాంటి దర్శకుడు ‘వారణాసి’ తర్వాత కూడా మరో అంతర్జాతీయ స్థాయి భారీ ప్రాజెక్ట్‌ను రూపొందిస్తారా? లేక చాలా కాలం తర్వాత చిన్న బడ్జెట్‌తో, బలమైన కథతో కూడిన సినిమాను ఎంచుకుంటారా? అన్న ఆసక్తి నెలకొంది. ట్రేడ్ వర్గాల అంచనాల ప్రకారం, ‘వారణాసి’ ప్రపంచవ్యాప్తంగా భారీ విజయాన్ని సాధిస్తే రాజమౌళి మరో గ్లోబల్ స్కేల్ ప్రాజెక్ట్ వైపు అడుగులు వేసే అవకాశాలు ఉన్నాయి. మరోవైపు వరుసగా భారీ చిత్రాల తర్వాత కొంత విరామం తీసుకుంటూ, ‘మర్యాద రామన్న’ తరహాలో పరిమిత బడ్జెట్‌తో వేగంగా పూర్తయ్యే కథను కూడా ఎంచుకునే అవకాశం ఉందని విశ్లేషకులు భావిస్తున్నారు.