సరైన విషయ పరిజ్ఞానం ఉన్నప్పటికీ ఒక్కోసారి తెలియకుండా తప్పులు జరిగిపోతుంటాయి. అగ్ర కథానాయిక ప్రియాంక చోప్రా విషయంలో అదే జరిగింది. అమెరికా జర్నలిస్ట్ డాజ్ షెఫర్డ్తో జరిపిన పోడ్కాస్ట్ ఇంటర్వ్యూలో ప్రియాంకచోప్రా ‘ఆర్ఆర్ఆర్’ చిత్రాన్ని తమిళ సినిమా అంటూ పదేపదే చెప్పడం అభిమానుల్ని విస్మయానికి గురిచేసింది. దక్షిణాది సినిమాపై మంచిపట్టున్న ప్రియాంక ఇలాంటి పొరపాటు చేయడమేంటని సోషల్మీడియాలో ట్రోల్స్ వెల్లువెత్తాయి. అసలు ఈ పోడ్కాస్ట్ ఇంటర్వ్యూ ఆసాంతం ఆయోమయంగా ఉందని విమర్శలొస్తున్నాయి.
ఇంటర్వ్యూ ఆరంభంలో డాజ్ షెఫర్డ్ ‘ఆర్ఆర్ఆర్’ చిత్రాన్ని బాలీవుడ్ సినిమాగా పేర్కొన్నారు. ఆయన మాటల్ని సరిదిద్దే క్రమంలో ప్రియాంకచోప్రా సైతం తప్పులో కాలేసింది. ‘ఆర్ఆర్ఆర్’ తమిళ సినిమా అని..హాలీవుడ్ అవెంజర్స్ తరహాలో ఇండియాలో పాపులర్ అయిందంటూ ప్రశంసలు కురిపించింది. అర్ధగంటకుపైగా సాగిన ఇంటర్వ్యూలో ప్రియాంక చోప్రా ఎక్కడా తన తప్పుని తెలుసుకోకుండా ‘ఆర్ఆర్ఆర్’ను తమిళ సినిమా అని చెప్పడం శ్రోతలకు చికాకు తెప్పించింది. కొందరు మాత్రం మాటల ప్రవాహంలో దొర్లిన తప్పు ఇదని ప్రియాంకచోప్రాకు మద్దతు తెలుపుతున్నారు. లాస్ఏంజెల్స్లో జరిగిన ‘ఆర్ఆర్ఆర్’ స్క్రీనింగ్కు సైతం హాజరైన ప్రియాంకచోప్రా ఇంత అవగాహన లేకుండా ఎలా మాట్లాడిందని తెలుగు సినీ అభిమానులు అసంతృప్తి వ్యక్తం చేస్తున్నారు.