నా మాటల్ని వక్రీకరించారు

అగ్ర హీరో బాలకృష్ణను వరుస వివాదాలు వెంటాడుతున్నాయి. ‘వీరసింహా రెడ్డి’ సక్సెస్‌మీట్‌లో అక్కినేని తొక్కినేని అంటూ ఆయన చేసిన వ్యాఖ్యలపై అక్కినేని అభిమానులు మండిపడ్డారు.

అగ్ర హీరో బాలకృష్ణను వరుస వివాదాలు వెంటాడుతున్నాయి. ‘వీరసింహా రెడ్డి’ సక్సెస్‌మీట్‌లో అక్కినేని తొక్కినేని అంటూ ఆయన చేసిన వ్యాఖ్యలపై అక్కినేని అభిమానులు మండిపడ్డారు. తన మాటల వెనక ఎలాంటి దురుద్దేశ్యం లేదని, ఏదో ఫ్లోలో అలా నోరుజారిందని బాలకృష్ణ ఆ వివాదంపై వివరణ ఇచ్చారు. తాజాగా అన్‌స్టాపబుల్‌ షోలో నర్సులపై అనుచిత వ్యాఖ్యలు చేశారు బాలకృష్ణ. ఓ పాత సంఘటనను గుర్తు చేసుకుంటూ.. ఆ సమయంలో తనకు వైద్యం చేసిన నర్సు భలే అందంగా ఉందంటూ కామెంట్‌ చేశారు.

దీనిపై నర్సులు తీవ్ర ఆగ్రహం వ్యక్తం చేస్తూ ఆందోళనలకు దిగారు. బాలకృష్ణ క్షమాపణలు చెప్పాలని డిమాండ్‌ చేశారు. తాజాగా ఈ వివాదంపై ట్విట్టర్‌లో వివరణ ఇచ్చారు బాలకృష్ణ. నర్సులను కించపరిచానంటూ చేస్తున్న అసత్య ప్రచారాన్ని ఖండిస్తున్నానని, తన మాటలను వక్రీకరించారని ఆయన పేర్కొన్నారు. నర్సులను తన సోదరీమణులుగా భావిస్తానని, వారంటే ఎంతో గౌరవమని తెలిపారు. ‘రాత్రింబవళ్లు రోగులకు సపర్యలు చేసి ప్రాణాలు నిలిపే నా సోదరీమణులంటే నాకెంతో గౌరవం. వారికి ఎన్నిసార్లు కృతజ్ఞతలు తెలిపినా తక్కువే. నిజంగా నా మాటలు మీ మనోభావాలను దెబ్బతీస్తే పశ్చాత్తాపం వ్యక్తం చేస్తున్నా’ అని బాలకృష్ణ పేర్కొన్నారు.