Visit:
కమల్‌హాసన్‌పై పొగడ్తలు కురిపిస్తున్నది నాయిక రకుల్‌ ప్రీత్‌సింగ్‌. ఆయన నటిస్తున్న కొత్త సినిమా ‘ఇండియన్‌ 2’లో రకుల్‌ ఒక హీరోయిన్‌గా నటిస్తున్నది. ప్రస్తుతం చెన్నైలో ఈ సినిమా షూటింగ్‌ జరుగుతోంది. ఈ సందర్భంగా సెట్‌లో కమల్‌హాసన్‌ పనితీరు చూసి ఆశ్చర్యాన్ని వ్యక్త పరిచిందీ తార. రకుల్‌ ప్రీత్‌ మాట్లాడుతూ…‘కమల్‌ మా సినిమా సెట్‌లో ఉదయం 5 గంటలకే అడుగుపెడతారు. ఆయన 90 ఏండ్ల వృద్ధుడి పాత్రను పోషిస్తున్నారు.
ఈ గెటప్‌ కోసం 5 గంటలు ప్రోస్థటిక్స్‌ (మేకప్‌) వేసుకుంటారు. దాన్ని తొలగించేందుకు మరో రెండు గంటలు పడుతుంది. ఉదయం పది గంటలకు కెమెరా ముందు సిద్ధమవుతారు. చెన్నైలో ఉండే వేడి, ఉక్కపోతలో ఐదు గంటలు క్యారెక్టర్‌ కోసం సిద్ధమవడం అంత సులువు కాదు. నటనకు ఇంతగా అంకితమయ్యే మరొకరిని చూడలేదు. నూరేండ్ల జీవితంలో 60 ఏండ్లకు పైగా కమల్‌ హాసన్‌ సినిమా రంగంలోనే ఉన్నారు. ఆయన జీవితాన్ని వెండితెరకు అంకితం చేశారు’ అని చెప్పింది.
