Javed Akhtar | ఆ వ్యసనం వల్ల విలువైన సమయాన్ని వృథా చేశా!: జావేద్‌ అక్తర్‌

మద్యపాన వ్యసనం వల్ల తన జీవితంలో పదేళ్ల విలువైన కాలాన్ని నష్టపోయానని చెప్పారు ప్రముఖ గీత రచయిత జావేద్‌ అక్తర్‌.

Javed Akhtar | మద్యపాన వ్యసనం వల్ల తన జీవితంలో పదేళ్ల విలువైన కాలాన్ని నష్టపోయానని చెప్పారు ప్రముఖ గీత రచయిత జావేద్‌ అక్తర్‌. ఇటీవల ఇచ్చిన ఓ ఇంటర్వ్యూలో మద్యపానం తాలూకు దుష్ప్రభావాల గురించి ఆయన మాట్లాడారు. 1991లో ఆల్కహాల్‌కు స్వస్తిపలికానని, అప్పటి నుంచి ఈ రోజూ వరకు ఒక్క చుక్క మద్యాన్ని ముట్టుకోలేదని చెప్పారు.

‘కెరీర్‌ పీక్‌ స్టేజీలో ఉన్నప్పుడు మద్యపానం అలవాటు ఎక్కువైంది. ఆ కారణంగా మానసికంగా, శారీరకంగా ఎంతో నష్టపోయా. భావోద్వేగాలు నా ఆధీనంలో ఉండేవి కావు. ఊరికే విపరీతమైన కోపం వచ్చేది. అందుకే మానుకోవాలని గట్టి నిర్ణయం తీసుకున్నా. గత 33 ఏండ్లుగా మద్యం ముట్టుకోలేదు. మద్యపానం వల్ల దాదాపు పదేండ్ల విలువైన సమయాన్ని నష్టపోయా. ఆ సమయాన్ని సద్వినియోగం చేసుకుంటే జీవితం ఇంకా అద్భుతంగా ఉండేది. నేటి యువత కూడా మద్యపానానికి దూరంగా ఉంటే జీవితాన్ని మరింత ఆనందమయం చేసుకోవచ్చు’ అని జావేద్‌ అక్తర్‌ అన్నారు.