‘అవతార్‌’ఫ్రాంచైజీలో మరిన్ని సినిమాలు

‘టర్మినేటర్‌-2’ ‘టైటానిక్‌' ‘అవతార్‌' వంటి చిత్రాలతో ప్రపంచవ్యాప్తంగా అభిమానుల్ని సంపాదించుకున్నారు దర్శకుడు జేమ్స్‌ కామెరాన్‌.

‘టర్మినేటర్‌-2’ ‘టైటానిక్‌’ ‘అవతార్‌’ వంటి చిత్రాలతో ప్రపంచవ్యాప్తంగా అభిమానుల్ని సంపాదించుకున్నారు దర్శకుడు జేమ్స్‌ కామెరాన్‌. ‘అవతార్‌’ ఫ్రాంచైజీలో భాగంగా ‘అవతార్‌-2’ చిత్రం ఈ నెల 16న ప్రపంచవ్యాపంగా భారీ స్థాయిలో విడుదలకాబోతున్న విషయం తెలిసిందే. ఈ సందర్భంగా మీడియాతో మాట్లాడిన జేమ్స్‌ కామెరాన్‌ ‘అవతార్‌’ ఫ్రాంచైజీ గురించి ఆసక్తికరమైన విషయాల్ని వెల్లడించారు.

‘అవతార్‌-3’ 2024లో విడుదలకాబోతున్నదని, నాలుగో భాగం తాలూకు చిత్రీకరణ కొంత పూర్తయిందని ఆయన వెల్లడించారు. ఐదో పార్ట్‌ గురించి ఇప్పటికే ప్రకటన వెలువడిందని, తనకు అవకాశమిస్తే అవతార్‌ 6, 7 భాగాల్ని కూడా తీస్తానని జేమ్స్‌ కామెరాన్‌ తెలిపారు. ‘ప్రేక్షకాదరణతో పాటు వ్యాపార సమీకరణాలు ఫ్రాంచైజీలను నిర్ణయిస్తాయి. ‘అవతార్‌’ఫ్రాంచైజీ చిత్రాలు మరిన్ని వచ్చే అంశాన్ని మార్కెట్‌ నిర్ణయిస్తుంది’ అని జేమ్స్‌ కామరూన్‌ అన్నారు.