మీరూ సాధించగలరు

సినీ పరిశ్రమలో మహిళలు దర్శకులు అవడం అరుదు. ఇప్పటికీ దేశవ్యాప్తంగా చిత్ర పరిశ్రమల్లో వేళ్ల మీద లెక్కపెట్టగలిగేంత మందే మహిళా దర్శకులు ఉన్నారు. వారిలో పేరు తెచ్చుకుని స్థిరపడే వాళ్లు మరీ తక్కువ. ‘గురు’,‘సురారైపోట్రు’ వంటి అర్థవంతమైన చిత్రాలు రూపొందించి మహిళా దర్శకుల్లో స్ఫూర్తి నింపుతున్నారు సుధా కొంగర. సూర్య హీరోగా ఆమె రూపొందించిన ‘సురారైపోట్రు’ చిత్రానికి ఇటీవల ప్రకటించిన జాతీయ పురస్కారాల్లో ఐదు అవార్డులు దక్కాయి.

ప్రస్తుతం ఆమె ఈ చిత్రాన్ని హిందీలో అక్షయ్‌ కుమార్‌ హీరోగా రూపొందిస్తున్నది. సుధా కొంగర ట్రాక్‌ రికార్డ్‌తో ఆమెతో సినిమాలు చేసేందుకు పలువురు అగ్ర హీరోలు ఆసక్తి చూపిస్తున్నారు. తను సాధించిన విజయాలే లేడీ డైరెక్టర్స్‌కు స్ఫూర్తి అని చెబుతున్నారు సుధా కొంగర. సుధా కొంగర మాట్లాడుతూ…‘మహిళా దర్శకులు తక్కువ మందే ఉన్నారు. ఇక్కడ కొందరికి త్వరగా అవకాశాలు వస్తాయి.

మరికొందరికి ఆలస్యమవుతాయి. కానీ మన సమయం వచ్చేవరకు ఓపికగా ఉండాలి. ఒక సాధారణ మహిళను నేను. నా చిత్రానికి జాతీయ పురస్కారం దక్కింది. సినీ పరిశ్రమలో ఇదే గొప్ప పురస్కారం. మీరూ నాలాగే సాధించగలరు’ అని చెప్పింది. కథా బలంతో పాటు హీరోయిజం ఉన్న సినిమాలు చేయడం సుధా కొంగర ప్రత్యేకతగా చెప్పుకోవచ్చు.