ఆరడుగుల బుల్లెట్ ఎట్టకేలకు దిగుతుంది.. పాత సినిమాను కొత్తగా ఆదరిస్తారా..?

October 4, 2021 / 06:09 PM IST

aaradugula bullet | గోపీచంద్‌, నయనతార నటించిన ఆర‌డుగుల బుల్లెట్‌ విషయంలో అనుకున్నట్లు జరిగుంటే ఈ సినిమా వ‌చ్చి నాలుగేండ్లు అయ్యుండేది. — aaradugula bullet

aaradugula bullet | ఒక్కోసారి అంతే మరి.. అదృష్టం అడ్డం తిరిగితే అరటిపండు తిన్నా కూడా పన్ను విరుగుద్ది.. గోపీచంద్‌ విషయంలో ఇదే జరుగుతుందిప్పుడు. ఈయన కెరీర్‌లో ఓ సినిమా చాలా ఇబ్బందులు పెడుతుంది. ఆ సినిమా పేరు ఆర‌డుగుల బుల్లెట్. అన్నీ అనుకున్నట్లు జరిగుంటే ఈ సినిమా వ‌చ్చి ఈ పాటికే 4 సంవత్సరాలు అయ్యుండేది. కానీ ఏం చేస్తాం.. కుదర్లేదంతే. నాలుగేళ్లుగా ఎప్పటికప్పుడు కొత్త రిలీజ్ డేట్స్ ప్రకటిస్తూ ఆ తర్వాత పూర్తిగా సినిమా విషయమే మరిచిపోయారు దర్శక నిర్మాతలు. నాలుగేళ్లుగా ఆర్థిక ఇబ్బందుల్లోనే ఉన్న ఈ చిత్రం ఇప్పుడు మ‌రింత‌ ఆర్థిక ఇబ్బందుల్లో మునిగిపోయింది. ఈ సినిమాను భారీ క్యాస్టింగ్ తో భారీ బ‌డ్జెట్ తో నిర్మించాడు తాండ్ర ర‌మేశ్‌. దాదాపు 18 కోట్ల‌తో ఆర‌డుగుల బుల్లెట్ తెర‌కెక్కింది. ఈ చిత్రానికి వ‌క్కంతం వంశీ ఈ చిత్రానికి క‌థ అందించ‌డం విశేషం. ఆర‌డుగుల బ‌ల్లెట్ సినిమాలో ప్ర‌కాశ్ రాజ్, నయనతార లాంటి స్టార్ క్యాస్ట్ ఉంది.

అన్నీ ఉన్నా.. అల్లుడి నోట్లో శ‌ని అన్న‌ట్లు ఆర‌డుగుల బుల్లెట్ ప‌రిస్థితి త‌యారైంది.ఈ చిత్రానికి చాలానే బ‌కాయిలు ఉండేవి. సినిమా విడుద‌లైన త‌ర్వాత సెటిల్ చేస్తాన‌ని నిర్మాత చెప్పినా బ‌య్య‌ర్లు విన‌లేదు. దీంతో ఎన్నిసార్లు సినిమా విడుద‌ల‌కు ప్లాన్ చేసినా వాళ్లు అడ్డుకున్నారు. దీనిపైనే ఇన్ని రోజులు రచ్చ జరిగింది. అయితే ఇన్ని రోజులకు ఓ క్లారిటీ వచ్చేసింది. దీంతో ఇప్పుడు ఈ సినిమాను విడుదల చేద్దామని నిర్మాతలు ప్లాన్ చేస్తున్నారు.

గోపీచంద్‌ కు యాక్షన్ హీరోగా మంచి ఇమేజ్ ఉండటం.. నయనతార హీరోయిన్ కావడంతో ఈ సినిమాను మంచి రేటుకి తీసుకుంటామంటున్నాయి డిజిటల్ సంస్థలు. ఇప్పటికే ఓ ప్రముఖ ఓటీటీ సంస్థ 15 కోట్లకు డీల్ కూడా మాట్లాడేసినట్లు తెలుస్తుంది. అయితే కొన్నేళ్ల‌ కింద జీ వాళ్ల‌కు ఈ చిత్ర శాటిలైట్, డిజిటల్ హక్కులు 8 కోట్లకు అమ్మేసినట్లు ప్రచారం జరుగుతుంది. దాంతో వాళ్లు ఆరడుగుల బుల్లెట్ ఓటీటీ రిలీజ్‌కు అడ్డుతగులుతున్నార‌ని వార్త‌లు వ‌చ్చాయి. తమకు అమ్మిన తర్వాత ఇప్పుడు రేట్ ఎక్కువ వచ్చిందని ఇతరులకు ఎలా అమ్మేస్తారంటూ వాళ్లు నిలదీస్తున్నారు. అయితే ఈ చిత్రాన్ని ఎలాగోలా అన్నీ క్లియర్ చేసి అక్టోబర్ 8న విడుదల చేస్తున్నారు ద‌ర్శ‌క నిర్మాత‌లు. తాజాగా కొత్త ట్రైలర్‌ను విడుదల చేశారు. పక్కా యాక్షన్ ఎంటర్ టైనర్ గా ఆరడుగుల బుల్లెట్ సినిమా వస్తుంది. మొత్తానికి పాత సినిమాను కొత్తగా ప్రేక్షకులు ఆదరిస్తారో లేదో చూడాలిక.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి