వెండితెరపై మాఫియా మాయాజాలం

ఓ సినిమా భారీ విజయాన్ని సాధించిందనుకోండి.. ఇక అదే తరహా కథలు వరుసపెట్టి వస్తూంటాయి. ఈ మూస ధోరణి చిత్ర పరిశ్రమలో పరిపాటే. కొన్నాళ్లు కుటుంబ కథలు.. ఇంకొన్నాళ్లు ప్రేమకథలు... మరికొన్నాళ్లు యాక్షన్‌ కథలు.. అలాగే పీరియాడిక్‌ డ్రామాలు.. ఇలా అన్నమాట.

ఓ సినిమా భారీ విజయాన్ని సాధించిందనుకోండి.. ఇక అదే తరహా కథలు వరుసపెట్టి వస్తూంటాయి. ఈ మూస ధోరణి చిత్ర పరిశ్రమలో పరిపాటే. కొన్నాళ్లు కుటుంబ కథలు.. ఇంకొన్నాళ్లు ప్రేమకథలు… మరికొన్నాళ్లు యాక్షన్‌ కథలు.. అలాగే పీరియాడిక్‌ డ్రామాలు.. ఇలా అన్నమాట. కాలాలు మారినట్టుగా ధోరణలు మారుతూవుంటాయి. ఒకప్పటి పాత ట్రెండ్‌ ఉన్నట్టుండి కొత్త ట్రెండై కూర్చుంటుంది. ఇప్పటి కొత్త ట్రెండ్‌ కొన్నాళ్లకూ పాతదై పోతుంది. గత ఏడాది పవన్‌కల్యాణ్‌ ‘ఓజీ’ సినిమా పవన్‌కల్యాణ్‌ కెరీర్లోనే భారీ వసూళ్లను రాబట్టిన విషయం తెలిసిందే. మరి ‘ఓజీ’ ప్రభావమో ఏమో కానీ.. ఇప్పుడు తెలుగు సినిమా దృష్టి నిదానంగా మాఫియా కథలవైపు మళ్లినట్టు కనిపిస్తున్నది. బడా హీరోలంతా మాఫియా డాన్లలా మారేందుకు రంగం సిద్ధం చేసుకుంటున్నారు. ఆ వివరాల్లోకెళ్తే..

• ప్రస్తుతం కేఎస్‌ రవీంద్ర(బాబీ) దర్శకత్వంలో చిరంజీవి ఓ సినిమా చేస్తున్న విషయం తెలిసిందే. ఇంకా పేరును నిర్ణయించని ఈ సినిమా మాఫియా నేపథ్యంలోనే సాగుతుందని తెలిసింది. ఇందులో చిరంజీవి ఇంతవరకూ కనిపించని కొత్త అవతారంలో కనిపిస్తారట. మాఫియా కథలు చిరంజీవికి కొత్తేం కాదు. 80sలోనే ఆయన చాలా మాఫియా కథల్లో నటించారు. మరి బాబీ తీస్తున్న ఈ సినిమా ఎలా ఉంటుందో చూడాలి. ఈ సినిమాను సంక్రాంతికి తీసుకొచ్చే ఆలోచనలో మేకర్స్‌ ఉన్నారు.
• ఇక నందమూరి బాలకృష్ణ విషయానికొస్తే.. ప్రస్తుతం ఆయన మలినేని గోపీచంద్‌ దర్శకత్వంలో ఓ సినిమా చేస్తున్నారు. ఈ సినిమా నిర్మాణ దశలో ఉన్నది. వచ్చే నెల నుంచి కొరటాల శివ సినిమా షూటింగ్‌ని కూడా ఆయన మొదలుపెట్టనున్నారు. రెండు సినిమాలూ సమాంతరంగా నిర్మాణం జరుపుకోనున్నాయి. గోపీచంద్‌ సినిమా దసరా కానుకగా విడుదల చేయాలనే లక్ష్యంతో మేకర్స్‌ ముందుకెళ్తున్నారు. ఇక కొరటాల శివ సినిమా డిసెంబర్‌లో కానీ, సంక్రాంతికి గానీ విడుదలయ్యే అవకాశం ఉంది. విశేషమేంటంటే.. ఈ రెండు సినిమాలూ మాఫియా కథలే. రెండిటిలోనూ బాలయ్య మాఫియా డాన్‌గా కనిపించబోతున్నారట. గతంలో అశోకచక్రవర్తి, యువరత్న రాణా, సుల్తాన్‌ చిత్రాల్లో బాలకృష్ణ మాఫియా డాన్‌గా నటించారు. మళ్లీ ఇన్నాళ్లకు వెండితెరపై డాన్‌ అవతారంలో ఆయన కనిపించనుండటంతో సదరు సినిమాలపై అభిమానులలో ఆసక్తి మొదలైంది.
• ఇక పవన్‌కల్యాణ్‌ ‘ఓజీ 2’కు సంబంధించిన సన్నాహాలు కూడా చకచకా జరిగిపోతున్నాయి. ‘ఓజీ’లో మాఫియా డాన్‌గా పవన్‌కల్యాణ్‌ నటనకు జనం జేజేలు పలికారు. అంతకు మించేలా ‘ఓజీ 2’ స్క్రిప్ట్‌ని దర్శకుడు సుజిత్‌ సిద్ధం చేశాడట. నిజానికి ‘ది ప్యారడైజ్‌’ తర్వాత నానితో సుజిత్‌ సినిమా చేయాలి. కానీ.. ‘ది ప్యారడైజ్‌’ ఆలస్యం అవుతుండటంతో సుజిత్‌ ‘ఓజీ 2’ పనులు మొదలుపెట్టారట. పవన్‌ కాల్షీట్లు ఓకే అయితే.. ‘ఓజీ 2’ మొదలయ్యే అవకాశం మెండుగా కనిపిస్తున్నది. ఇందులో కూడా పవన్‌ కల్యాణ్‌ మాఫియా డాన్‌ పాత్రలోనే కనిపించనున్న విషయం తెలిసిందే.
• ఇక ‘కేజీఎఫ్‌’ఫేం యశ్‌ నటించిన పానిండియా చిత్రం ‘టాక్సిక్‌’ కూడా మాఫియా నేపథ్య చిత్రమే. అంతర్జాతీయ మాఫియా నేపథ్యంలో సాగే ఈ యాక్షన్‌ థ్రిల్లర్‌లో ైస్టెలిష్‌ డాన్‌లా యశ్‌ కనిపించబోతున్నారు. గీతూ మోహన్‌దాస్‌ దర్శకత్వం వహిస్తున్న ఈ పానిండియా చిత్రం ఈ ఏడాదే విడుదల కానున్నది.

ఇక సుజిత్‌ దర్శకత్వంలో నాని నటించబోతున్న ‘బ్లడీ రోమియో’ సినిమా కూడా మాఫియా నేపథ్య చిత్రమేనని వినికిడి. ఓ స్టార్‌ హోటల్‌లో సాధారణ ఛెఫ్‌గా కనిపించే వ్యక్తి.. కథలోని కీలకమైన సందర్భంలో భయంకరమైన గ్యాంగ్‌స్టర్‌గా దర్శనమిస్తాడట. దర్శకుడు సుజిత్‌ తనదైన శైలిలో ైస్టెలిష్‌ యాక్షన్‌ థ్రిల్లర్‌గా ఈ సినిమాను తెరకెక్కించనున్నారట.

ఇవిగాక, మరికొన్ని మాఫియా కథలు కూడా త్వరలో రానున్నట్టు సమాచారం. చివరిగా చెప్పేదేంటంటే.. ట్రెండ్‌ ఏదైనా ఎమోషన్స్‌ మాత్రం కథల్లో పక్కాగా ఉండాల్సిందే. భావోద్వేగాలు లేని కథల్ని ఎంత భారీగా తీసినా రాణించవు. ఈ విషయాన్ని దృష్టితో పెట్టుకొని కథల్ని వండితే.. ట్రెండ్‌ ఏదైనా విజయాలు వాటంతట అవే వస్తాయి.