Pre Release Event | చెల్లెలి కోసం వస్తున్న చిరంజీవి.. గుడ్ లక్ కీర్తి సురేశ్‌..

January 25, 2022 / 10:04 PM IST

Good Luck Sakhi Pre release Event | ఈ మధ్య కాలంలో ఇండస్ట్రీలో ఏ ఫంక్షన్ జరిగినా కూడా దానికి ముఖ్య అతిథిగా మెగాస్టార్‌ చిరంజీవి వెళ్తున్నాడు. ఇండస్ట్రీ పెద్ద అవ్వకుండానే అన్ని వేడుకలకు పెద్దదిక్కు అవుతున్నాడు మెగాస్టార్. అయితే ఇండస్ట్రీలో చాలా మంది యువ దర్శక నిర్మాతలు చిరంజీవి ముఖ్య అతిథిగా పిలుచుకుంటే సినిమాకు పబ్లిసిటీతో పాటు ఆయన ఆశీర్వాదం కూడా ఉంటుందని భావిస్తున్నారు. అందుకే చిన్న సినిమా నుంచి పెద్ద సినిమాల వరకు అందరూ చిరంజీవి దగ్గరికి వెళ్తున్నారు. ఆయన కూడా కాదనకుండా అన్ని వేడుకలకు వచ్చి తన ఆశీర్వాదాలు ఇస్తున్నాడు. తాజాగా కీర్తి సురేశ్ ప్ర‌ధాన పాత్ర‌లో నటించిన గుడ్ లక్ సఖి సినిమా ప్రీ రిలీజ్ ఈవెంట్‌కు చిరంజీవి ముఖ్య అతిథిగా వస్తున్నాడు.

జనవరి 28న థియేటర్స్‌లో విడుదల కానున్న గుడ్ లక్ సఖి సినిమా ప్రీ రిలీజ్ ఈవెంట్.. జనవరి 26న హైదరాబాద్ పార్క్ హయత్ లో జరగనుంది. ఆది పినిశెట్టి, జగపతి బాబు కీలక పాత్రల్లో నటించిన ఈ సినిమాను అవార్డు విన్నింగ్ డైరెక్టర్ నగేశ్‌ కుకునూర్ తెరకెక్కించాడు. గన్ షూటింగ్ నేపథ్యంలో ఈ సినిమా తెరకెక్కింది. బ్యాడ్ లక్ తప్ప గుడ్ అంటూ తెలియని ఒక అమ్మాయి కథ ఇది. ఇందులో పక్కా పల్లెటూరి అమ్మాయిగా నటించింది కీర్తి సురేశ్‌. ఇప్పటికే విడుదలైన ట్రైలర్ యూట్యూబ్‌లో మిలియన్స్ కొద్దీ వ్యూస్ అందుకుంటుంది. ట్రైలర్ చూశాక సినిమాపై అంచనాలు పెరిగిపోయాయి. కరోనా ఉన్న కూడా ధైర్యంగా ఈ సినిమాను థియేటర్స్‌లో విడుదల చేస్తున్నారు. ఇక ఈ సినిమా ప్రీ రిలీజ్ ఈవెంట్‌కు చిరంజీవి కూడా వస్తుండటంతో అంచనాలు మరింత పెరగడం ఖాయం.

మెహర్ రమేశ్‌ దర్శకత్వంలో వస్తున్న భోళా శంకర్ సినిమాలో చిరంజీవి చెల్లిగా నటిస్తుంది కీర్తి సురేశ్‌. సిస్టర్ సెంటిమెంట్ తో వస్తున్న ఈ సినిమా తమిళ వేదాళం సినిమాకు రీమేక్. చిరంజీవితో రిలేషన్ కీర్తి సురేశ్‌కు ఇప్పుడు బలంగా ఉంది. అందుకే ఆన్ స్క్రీన్ చెల్లి కోసం ఇలాంటి పరిస్థితుల్లో కూడా బయటకు వస్తున్నాడు మెగాస్టార్. ఈ సినిమాకు దేవిశ్రీ ప్రసాద్ సంగీతం అందించడం గమనార్హం.