Visit:
Atlee | తమిళ సినీ పరిశ్రమలో స్టార్ హీరో విజయ్‌తో వరుస విజయవంతమైన చిత్రాలు తెరకెక్కించిన దర్శకుడు అట్లీకి ప్రత్యేకమైన క్రేజ్ ఉంది. విజయ్‌తో ‘తెరి’, ‘మెర్సల్’, ‘బిగిల్’ వంటి సినిమాలు చేసిన అట్లీ.. ప్రస్తుతం బాలీవుడ్‌తో పాటు పాన్ ఇండియా స్థాయిలోనూ సినిమాలు చేస్తున్నారు. తాజాగా విజయ్ కుమారుడు జేసన్ సంజయ్‌తో కలిసి సినిమా చేసే అవకాశం ఉందా అనే ప్రశ్నకు అట్లీ ఇచ్చిన సమాధానం ఆసక్తికరంగా మారింది. జేసన్ సంజయ్ ఇటీవలే దర్శకుడిగా తన సినీ ప్రయాణాన్ని ప్రారంభించారు. ఆయన దర్శకత్వం వహించిన తొలి చిత్రం ‘సిగ్మా’లో సందీప్ కిషన్, ఫారియా అబ్దుల్లా ప్రధాన పాత్రల్లో నటించారు. దర్శకుడిగా జేసన్ సంజయ్ తొలి అడుగులు వేస్తున్న నేపథ్యంలో.. ఆయనతో అట్లీ కలిసి పనిచేస్తారా అనే ప్రశ్న సహజంగానే ఎదురైంది.
ఈ ప్రశ్నకు అట్లీ సానుకూలంగా స్పందించారు. జేసన్ సంజయ్ తమకు తమ్ముడి లాంటి వ్యక్తి అని పేర్కొన్న అట్లీ.. భవిష్యత్తులో ఆయనతో తప్పకుండా కలిసి పనిచేస్తామని చెప్పారు. తమ దగ్గర కొన్ని కథలు ఉన్నాయని, సినిమాలు చేయడం తమకు బాగా తెలిసిన పని అని అట్లీ వ్యాఖ్యానించారు. అయితే అట్లీ, జేసన్ సంజయ్ కలిసి చేయబోయే సినిమా గురించి మాత్రం ఎలాంటి స్పష్టమైన ప్రకటన చేయలేదు. జేసన్ సంజయ్‌ను దర్శకుడిగా పెట్టుకుని అట్లీ సినిమా నిర్మిస్తారా? లేక అట్లీ దర్శకత్వంలో జేసన్ నటిస్తారా? అనే ప్రశ్నకు కూడా ఆయన సరదాగా సమాధానం ఇచ్చారు. సరైన సమయం, సరైన కథ, ప్రాజెక్ట్ అన్నీ కుదిరినప్పుడు కలిసి పనిచేస్తామని అట్లీ సంకేతాలు ఇచ్చారు.
దీంతో ప్రస్తుతం ఎలాంటి అధికారిక ప్రాజెక్ట్ లేకపోయినా.. భవిష్యత్తులో అట్లీ, జేసన్ సంజయ్ కాంబినేషన్‌లో సినిమా వచ్చే అవకాశాలను పూర్తిగా కొట్టిపారేయలేమనే టాక్ మొదలైంది. ముఖ్యంగా విజయ్‌తో అట్లీకి ఉన్న సుదీర్ఘ అనుబంధం, జేసన్‌తో ఉన్న సాన్నిహిత్యం ఈ కాంబినేషన్‌పై ఆసక్తిని మరింత పెంచుతోంది.విజయ్ కుమారుడిగా సినీ కుటుంబ నేపథ్యం ఉన్నప్పటికీ.. జేసన్ సంజయ్ దర్శకుడిగా తనకంటూ ప్రత్యేక గుర్తింపు తెచ్చుకునేందుకు ప్రయత్నిస్తున్నారు. ‘సిగ్మా’తో ఆయన దర్శకత్వ బాధ్యతలు చేపట్టారు. సందీప్ కిషన్, ఫారియా అబ్దుల్లా ప్రధాన పాత్రల్లో నటించిన ఈ చిత్రం ద్వారా జేసన్ తన ఆలోచనా విధానాన్ని తెరపై చూపించే ప్రయత్నం చేశారు.మరోవైపు అట్లీ ఇప్పటికే తన దర్శకత్వ ప్రతిభతో తమిళంతో పాటు ఇతర భాషల ప్రేక్షకుల్లోనూ గుర్తింపు తెచ్చుకున్నారు. విజయ్‌తో చేసిన మూడు సినిమాలు ఆయన కెరీర్‌లో కీలకంగా నిలిచాయి. అందుకే విజయ్ కుటుంబానికి చెందిన జేసన్‌తో అట్లీ కలిసి పనిచేస్తే ఆ ప్రాజెక్ట్‌పై భారీ అంచనాలు ఏర్పడే అవకాశం ఉంది.
