జాతిరత్నాలు (Jathiratnalu) సినిమాతో బ్లాక్ బాస్టర్ హిట్టు కొట్టాడు యువ దర్శకుడు అనుదీప్ కేవీ (Anudeep KV). ఈ క్రేజీ డైరెక్టర్ ప్రస్తుతం కోలీవుడ్ స్టార్ హీరో శివకార్తికేయన్ (Siva Karthikeyan)తో ప్రిన్స్ సినిమా చేస్తున్నాడు. ఈ ప్రాజెక్టు పోస్ట్ ప్రొడక్షన్ కార్యక్రమాలతో బిజీగా ఉన్నాడు అనుదీప్ కేవీ. ఈ క్రేజీ డైరెక్టర్ విక్టరీ వెంకటేశ్ (Venkatesh)తో సినిమా చేయబోతున్న విషయం తెలిసిందే. రీసెంట్గా అనిల్ రావిపూడి డైరెక్షన్లో వచ్చిన ఎఫ్ 3లో పొట్టచెక్కలయ్యే కామెడీతో వినోదాన్ని అందించాడు వెంకీ.
యాక్షన్, కామెడీ, సీరియస్, సస్పెన్స్..ఇలా ప్రతీ జోనర్స్ లో సినిమాలు చేయడంలో ఎప్పుడూ ముందుంటాడు వెంకీ. ప్రత్యేకించి వెంకీ స్టైల్ ఆఫ్ కామెడీని సిల్వర్ స్క్రీన్పై చూసి కడుపుబ్బా నవ్వుకోవడం మాత్రం పక్కా అని చెప్పొచ్చు. తాజాగా వెంకీ-అనుదీప్ సినిమా అప్డేట్ ఒకటి ఫిలింగనగర్ సర్కిల్లో చక్కర్లు కొడుతోంది. ప్రిన్స్ సినిమా పనులు పూర్తయిన వెంటనే వెంకీ సినిమాను సెట్స్ పైకి తీసుకెళ్లేందుకు ప్లాన్ చేస్తున్నాడట. అంతేకాదు ఇందులో వెంకీ కామెడీ యాంగిల్ను ఫుల్గా వాడుకోబోతున్నట్టు టాక్ వినిపిస్తోంది.
సినిమా లైన్ను వెంకటేశ్కు వినిపించిన వెంటనే కేవలం 10 నిమిషాల్లోనే బాగా నచ్చేసిందని అనుదీప్కు చెప్పినట్టు ఇన్ సైడ్ టాక్. ఆ లైన్ ఆధారంగా స్క్రిప్ట్ వర్క్ పూర్తి చేయనున్నాడట అనుదీప్. వెంకటేశ్ ఇటీవలే నెట్ఫ్లిక్స్ సిరీస్ రానా నాయుడు షూటింగ్ పూర్తి చేశాడు. స్క్రిఫ్ట్ పూర్తవగానే వీలైనంత త్వరగా జాతిరత్నాలు డైరెక్టర్ సినిమా షురూ చేయాలని అనుకుంటున్నాడట.