బంజారాహిల్స్, నవంబర్ 15: బంజారాహిల్స్లోని కేబీఆర్ పార్కు బయట వాకింగ్కు వచ్చిన సినీనటి షాలూ చౌరాసియాపై గుర్తు తెలియని వ్యక్తి దాడికి పాల్పడడంతో పాటు సెల్ఫోన్ లాక్కుని పరారయ్యాడు. పోలీసులు తెలిపిన వివరాల ప్రకారం.. ఆదివారం రాత్రి 8.40 గంటల సమయంలో వాకింగ్ చేస్తున్న షాలూను కొంతదూరం అనుసరించిన దుండగుడు..జూబ్లీహిల్స్ రోడ్ నెం 92లోని స్టార్బక్స్ ఎదురుగా నిర్మానుష్య ప్రాంతం వద్ద దాడి చేశాడు. కేకలు పెట్టకుండా నోటికి గుడ్డలు అడ్డుపెట్టి.. పక్కనే ఉన్న బండరాయికి అదిమిపెట్టాడు. బంగారం.. నగదు ఇవ్వాలంటూ డిమాండ్ చేశాడు. ఈ క్రమంలో జరిగిన పెనుగులాటలో చౌరాసియాకు గాయాలయ్యాయి. ఆమె చేతిలోని సెల్ఫోన్ లాక్కున్న దుండగుడు.. బండరాయి తలపై వేసేందుకు ప్రయత్నించగా, ఆమె ప్రతిఘటించి.. పక్కనే ఉన్న గేటు వైపు పరిగెత్తింది. స్టార్ బక్స్ వద్ద పనిచేస్తున్న కొందరు డ్రైవర్ల సాయంతో జరిగిన విషయాన్ని తల్లికి ఫోన్ చేసి చెప్పింది. స్థానికులు డయల్ 100కు ఫోన్ చేయగా, బంజారాహిల్స్ పోలీసులు అక్కడకు చేరుకున్నారు. స్టార్ ఆస్పత్రిలో ప్రాథమిక చికిత్స పొందిన అనంతరం షాలూ రాత్రి 11.30 సమయంలో బంజారాహిల్స్ పోలీసులకు ఫిర్యాదు చేసింది. కేసు నమోదు చేసుకున్న పోలీసులు ప్రత్యేక బృందాలు ఏర్పాటు చేసి.. నిందితుడి కోసం గాలింపు చేపట్టారు. సమీపంలోని సీసీ కెమెరాల ఫుటేజీని పరిశీలిస్తున్నారు. కేవలం ఆభరణాలు, సెల్ఫోన్ కోసమే దాడికి పాల్పడ్డాడా..లేక మరేదైనా కారణం ఉందా అనే కోణంలో కూడా దర్యాప్తు చేస్తున్నారు.