Visit:
ఇటీవల ప్రకటించిన జాతీయ చలన చిత్ర పురస్కారాల్లో 2024 సంవత్సరానికిగాను ‘35-చిన్న కథకాదు’ చిత్రం ఉత్తమ బాలల చిత్రంగా ఎంపికైన విషయం తెలిసిందే. నివేధా థామస్, ప్రియదర్శి, విశ్వదేవ్ ప్రధాన పాత్రల్ని పోషించారు. నందకిషోర్ దర్శకత్వం వహించిన ఈ చిత్రానికి సృజన్ యర్రబోలు, సిద్ధార్థ్ రాళ్లపల్లి నిర్మాతలు. గురువారం ఈ సినిమా తాలూకు స్క్రీన్ప్లే పుస్తకాన్ని ఆవిష్కరించారు.
2018లో ఓ చిన్న ఆలోచనతో మొదలైన ఈ సినిమా ప్రయాణం జాతీయ అవార్డును గెలుచుకునే వరకు వెళ్లడం ఓ మధురజ్ఞాపకమని, ఇది తమపై మరింత బాధ్యతను పెంచిందని, ఈ సినిమా స్క్రీన్ప్లే పుస్తకం చాలా మందికి ఉపయుక్తంగా ఉంటుందని దర్శకుడు నందకిషోర్ తెలిపారు. రెండేళ్ల తర్వాత కూడా ఈ సినిమా గురించి ప్రేక్షకులు మాట్లాడుకుంటున్నారని, ఇప్పుడీ సినిమా ఘనత ఢిల్లీ వరకు చేరిందని హీరో విశ్వదేవ్ ఆనందం వ్యక్తం చేశారు. ఈ కార్యక్రమంలో చిత్ర యూనిట్ సభ్యులందరూ పాల్గొన్నారు.
