Vehicle Sales | గత నెలలో వాహనాల విక్రయాల్లో రికార్డులు నమోదయ్యాయి. 2021 నవంబర్ నెలతో పోలిస్తే గత నెలలో హోల్ సేల్ వెహికల్ సేల్స్ 19.8 శాతం పెరిగాయి. గతేడాది నవంబర్ లో 12,99,716 వాహనాలు (ప్యాసింజర్ వెహికల్స్, టూ వీలర్స్, త్రీ వీలర్స్, క్వాడ్రీ సైకిల్స్) అమ్ముడైతే, గత నెలలో 15,58,145 యూనిట్ల వెహికల్స్ సేల్ అయ్యాయని ఇండస్ట్రీ బాడీ సొసైటీ ఆఫ్ ఇండియన్ ఆటోమొబైల్ మాన్యుఫాక్చరర్స్ (సియామ్) వెల్లడించింది. వీటిల్లో బీఎండబ్ల్యూ, మెర్సిడెస్, టాటా మోటార్స్, వోల్వో ఆటో సేల్స్ వివరాలను కలుపలేదు. కస్టమర్ల నుంచి సానుకూలత నెలకొన్నా.. అధిక వడ్డీరేట్లు ఆందోళనకరంగా మారాయని సియామ్ పేర్కొంది.
కార్ల విక్రయాలు గతేడాది నవంబర్తో పోలిస్తే 28.1 శాతం పెరిగాయి. గతేడాది 2,15,626 కార్లు అమ్ముడైతే, గత నెలలో 2,76,231 కార్లు అమ్ముడయ్యాయి. టూ వీలర్స్ సేల్స్లో 16.4 శాతం గ్రోత్ నమోదైంది. గతేడాది నవంబర్ నెలలో 10,61,493 టూ వీలర్స్ అమ్ముడైతే, గత నెలలో 12,36,190 యూనిట్లు సేల్ అయ్యాయి.
నవంబర్ వెహికల్ సేల్స్లో వినియోగదారుల్లోనూ, వ్యాపారవేత్తల్లోనూ పాజిటివ్ సెంటిమెంట్ ప్రతిబింబిస్తున్నదని సియాం ప్రెసిడెంట్ వినోద్ అగర్వాల్ తెలిపారు. అధిక వడ్డీరేట్లు, దీర్ఘకాలిక వెహికల్ ఇన్సూరెన్స్ ప్రీమియం కస్టమర్లకు ఆందోళన కలిగిస్తున్నాయని సియామ్ డైరెక్టర్ జనరల్ రాజేశ్ మేనన్ చెప్పారు. ప్రస్తుత ఆర్థిక సంవత్సరంలో రికార్డు స్థాయిలో వెహికల్ సేల్స్ జరిగినా 2010-11తో పోలిస్తే త్రీ వీలర్ సేల్స్, 2016-17తో పోలిస్తే టూ వీలర్స్ సేల్స్ తక్కువే అని రాజేశ్ మేనన్ పేర్కొన్నారు.