Income Tax | గత ఆర్థిక సంవత్సరానికి (2022-23) ఆదాయం పన్ను రిటర్న్స్ (ఐటీఆర్) దాఖలు చేయడానికి ఈ నెల 31వ తేదీ తుది గడువు. ప్రతి వేతన జీవి, చిన్న వ్యాపారి, కార్పొరేట్ ఎగ్జిక్యూటివ్ వరకు.. ఐటీ రిటర్న్స్ దాఖలు చేసే ప్రతి ఒక్కరూ తమకు వచ్చే అన్ని రకాల ఆదాయం, పెట్టుబడి లాభాల వివరాలపై సరైన సమాచారం ఇవ్వాల్సిందే. ఒకవేళ, మీరు బంగారం విక్రయించినా, దానిపై వచ్చే లాభం మీద ఐటీ చెల్లించాల్సిందే. ఒకవేళ మీరు బంగారం విక్రయం మీద వచ్చిన లాభంపై పన్ను చెల్లించ లేదనుకోండి.. పన్ను ఎగవేతకు పాల్పడినట్లు ఆదాయం పన్ను విభాగం నిర్ణయిస్తుంది. ఈ పరిస్థితుల్లో మీకు ఆదాయం పన్ను విభాగం నోటీసులు జారీ చేస్తుంది.
ఆభరణాలు, బంగారం నాణాలు, ఇతర గోల్డ్ ఐటమ్స్ కూడా ఫిజికల్ గోల్డ్లో భాగమే. మీరు బంగారం కొన్న మూడేండ్ల లోపు విక్రయిస్తే, దాన్ని స్వల్పకాలిక పెట్టుబడి లాభంగా పరిగణిస్తారని చార్టర్డ్ అకౌంటెంట్ (సీఏ) అభయ్ శర్మ చెప్పారు. మీకు వచ్చే ఆదాయం, దానిపై ఐటీ శ్లాబ్ ను బట్టి బంగారం విక్రయంపై వచ్చే లాభం మీద పన్ను విధిస్తారు. బంగారం కొన్న మూడేండ్ల తర్వాత విక్రయిస్తే దీర్ఘకాలిక పెట్టుబడి లాభంగా పరిగణిస్తారు. దీర్ఘకాలిక పెట్టుబడి లాభాలపై 20.8 శాతం ఐటీ చెల్లించాల్సి ఉంటుంది.
గోల్డ్ ఈటీఎఫ్లు, గోల్డ్ మ్యూచువల్ ఫండ్స్ కొనుగోలు చేసిన మూడేండ్ల లోపు విక్రయిస్తే స్వల్పకాలిక పెట్టుబడి లాభాలపై పన్ను పే చేయాల్సి ఉంటుంది. అదీ కూడా మీ ఇన్కం టాక్స్ శ్లాబ్ను బట్టి ఆధార పడి ఉంటుంది. గోల్డ్ ఈటీఎఫ్, గోల్డ్ మ్యూచువల్ ఫండ్స్ కొనుగోలుచేసిన మూడేండ్ల తర్వాత విక్రయించినా దీర్ఘకాలిక లాభాలపై పన్ను పే చేయాలి.
ఉదాహరణకు సావరిన్ గోల్డ్ బాండ్ల మెచ్యూరిటీ గడువు ఎనిమిదేండ్లు ఉంటుంది. ఒకవేళ అత్యవసర కారణాల రీత్యా మెచ్యూరిటీ తేదీకి ముందే విత్ డ్రా చేస్తే క్యాపిటల్ గెయిన్స్ టాక్స్ వర్తిస్తుంది. గోల్డ్ బాండ్లపై 2.50 శాతం వడ్డీ లభిస్తుంది. మధ్యలో విత్ డ్రా చేసుకుంటే పన్ను పే చేయాల్సి ఉంటుంది. అలా కాక గడువు పూర్తయ్యే వరకు కొనసాగితే పన్ను మినహాయింపు లభిస్తుంది.
ఉదాహరణకు మీరు కొన్నేండ్ల క్రితం రూ.లక్ష విలువ గల బంగారం లేదా ఆస్తి కొనుగోలు చేశారనుకుందాం.. ఇప్పుడు అది రూ.2 లక్షలైతే.. అదనపు రూ.లక్షను క్యాపిటల్ గెయిన్స్ కింద పరిగణిస్తారు. ఆ రూ.లక్ష మీదే ఆదాయం పన్ను విధిస్తారు.