Swiggy Snacc | ‘స్నాక్‌’ యాప్ మూసేసిన స్విగ్గీ.. లాభాలు లేకపోవడంతో ఏడాదికే క్లోజ్

Swiggy Snacc : ఫుడ్ అండ్ గ్రాసరీ డెలివరీ యాప్ తన ‘స్నాక్‌’ యాప్ సేవల్ని నిలిపివేసింది. గురువారం నుంచి ఈ యాప్ మూసి వేస్తున్నట్లు సంస్థ ప్రకటించింది. యాప్ ప్రారంభమైన ఏడాదికే ఇది క్లోజ్ అవ్వడం గమనార్హం.

Swiggy Snacc : ఫుడ్ అండ్ గ్రాసరీ డెలివరీ యాప్ తన ‘స్నాక్‌’ యాప్ సేవల్ని నిలిపివేసింది. గురువారం నుంచి ఈ యాప్ మూసి వేస్తున్నట్లు సంస్థ ప్రకటించింది. యాప్ ప్రారంభమైన ఏడాదికే ఇది క్లోజ్ అవ్వడం గమనార్హం. లాస్ట్ మినట్ ఫుడ్ డెలివరీ యాప్‌గా ఇది ప్రారంభమైంది. బెంగళూరు కేంద్రంగా ‘స్నాక్‌’ యాప్ గత ఏడాది జనవరిలో ప్రారంభమైంది.

స్విగ్గీ సంస్థకు చెందినదే అయినప్పటికీ ఇది స్టాండలోన్ యాప్. 10 నుంచి 15 నిమిషాల్లో ఫుడ్ డెలివరీ చేయడం దీన ప్రత్యేకత. స్విగ్గీకి చెందిన ఇన్‌స్టామార్ట్ కంపెనీకి పోటీగా ఉన్న జెప్టో.. జెప్టో కేఫ్, బ్లింకిట్ సంస్థ బిస్ట్రోను తీసుకొచ్చిన సంగతి తెలిసిందే. దీంతో స్విగ్గీ కూడా ‘స్నాక్‌’ పేరుతో వాటికి పోటీగా యాప్ లాంఛ్ చేసింది. స్నాక్స్, బెవరేజెస్, మినీ మీల్స్, డెజర్ట్స్ వంటి ఈజీగా అందివ్వగలిగే ఫుడ్ ఐటమ్స్‌ను ఇది డెలివరీ చేసేది. హోటల్స్, రెస్టారెంట్స్, ఇతర స్టోర్స్‌కు ఐటమ్స్ సరఫరా చేసే సంస్థల నుంచి ‘స్నాక్‌’ ఆహారోత్పత్తుల్ని సేకరించి, వినియోగదారులకు చేరవేస్తుండేది. కానీ, ఈ సేవలకు సరైన ఆదరణ లభించలేదు. ఈ ఏడాది కాలంగా అనుకున్నంతగా లక్ష్యాన్ని చేరుకోలేదు.

దీంతో నిర్వహణ, ఆర్థిక పరమైన ఇబ్బందులు ఎక్కువ కావడంతో ‘స్నాక్‌’ యాప్‌ను మూసేయాలని నిర్ణయించుకుంది. అలాగే ఇతర వ్యాపార అవకాశాలపై దృష్టి పెట్టాలని ఈ నిర్ణయం తీసుకున్నట్లు తెలిపింది. దీంతో ఈ రోజు నుంచి ఈ సేవలు నిలిచిపోయాయి. అయితే, తాము మాత్రం ప్రయోగాలు చేయడం ఆపబోమని స్విగ్గీ సంస్థ ప్రకటించింది.