RBI-Gold | ఇంగ్లండ్ నుంచి 100 టన్నుల బంగారం తరలించిన ఆర్బీఐ.. ఎందుకంటే..?!

RBI-Gold | ఇంగ్లండ్ నుంచి ఆర్బీఐ సుమారు 100 టన్నుల అంటే లక్ష కిలోల బంగారాన్ని స్వదేశానికి తరలించింది.

RBI-Gold | ఇంగ్లండ్ నుంచి ఆర్బీఐ సుమారు 100 టన్నుల అంటే లక్ష కిలోల బంగారాన్ని స్వదేశానికి తరలించింది. 1991 తర్వాత భారీ మొత్తంలో బంగారం తరలించడం ఇదే మొదటిసారి. 1991లో ఆర్థిక సంక్షోభం వల్ల భారత్ భారీగా బంగారం నిల్వలు తాకట్టు పెట్టింది. రవాణా, నిల్వ సర్దుబాట్లలో భాగంగానే ఆర్బీఐ భారీగా బంగారాన్ని తీసుకొచ్చింది.

కొన్నేండ్లుగా భారతీయ రిజర్వు బ్యాంక్ (ఆర్బీఐ) భారీగా బంగారం కొనుగోలు చేస్తున్నది. అలా కొనుగోలు చేసిన బంగారం ఎక్కడ నిల్వ చేయాలన్న విషయమై సమీక్షిస్తూ నిర్ణయాలు తీసుకుంటున్నది ఆర్బీఐ. ముంబైలోని మింట్ రోడ్డుతోపాటు నాగ్‌పూర్‌లోని తన పాత కార్యాలయంలో బంగారం నిల్వ చేస్తుంది. విదేశాల్లో బంగారం నిల్వలు గణనీయంగా పెరగడంతో కొంత మొత్తం స్వదేశానికి తరలించాలని ఆర్బీఐ నిర్ణయించింది.

ఆర్బీఐతోపాటు పలు దేశాల కేంద్రీయ బ్యాంకులు తమ బంగారాన్ని బ్యాంకు ఆఫ్ ఇంగ్లండ్‌లో నిల్వ చేస్తుంటాయి. గత మార్చి నెలాఖరు నాటికి ఆర్బీఐ వద్ద 822.1 టన్నుల బంగారం ఉంటే, అందులో 413.8 టన్నులు ఇతర దేశాల్లో నిల్వ చేసింది. ఇటీవల వరుసగా బంగారం కొనుగోళ్లు జరిపిన ఆర్బీఐ.. గతేడాది 27.5 టన్నుల పుత్తడిని కొత్త నిల్వల్లో చేర్చింది. ఈ ఏడాది బంగారం కొనుగోళ్లు పెంచిన సెంట్రల్ బ్యాంక్.. గత జనవరి-ఏప్రిల్ మధ్యకాలంలో 2023 లో కొన్న బంగారానికంటే ఒకటిన్నర రెట్లు కొనుగోలు చేసింది.