క్యూజాబ్స్‌ జోరు

• 20 లక్షలకు యూజర్ల సంఖ్య
• టాప్‌-5 నగరాల్లో హైదరాబాద్‌

ముంబై, జనవరి 24: ఆన్‌లైన్‌ జాబ్‌ సెర్చింగ్‌ యాప్‌, ట్రైనీ-నైపుణ్య ఉద్యోగార్థుల రిక్రూట్‌మెంట్‌ వేదిక.. క్యూజాబ్స్‌ యూజర్ల సంఖ్య 20 లక్షలను దాటింది. కేవలం 100 రోజుల రికార్డు సమయంలోనే 10 లక్షల యూజర్లు పెరగడం గమనార్హం. సంస్థలు, చిన్న-మధ్యతరహా వ్యాపారుల నుంచి పండుగ సీజన్‌ డిమాండ్‌ ఉండటంతో గతేడాది అక్టోబర్‌-డిసెంబర్‌లో క్యూజాబ్స్‌పై ఉద్యోగాల సంఖ్య కూడా రెట్టింపునకుపైగా పెరగడం గమనార్హం. కాగా, డెలివరీ, బీపీవో/కస్టమర్‌ కేర్‌, డేటా ఎంట్రీ/బ్యాక్‌ ఆఫీస్‌, ఫీల్డ్‌ సేల్స్‌, డ్రైవర్‌ విభాగాల్లో డిమాండ్‌ ఎక్కువగా ఉన్నట్టు క్యూజాబ్స్‌ సోమవారం తెలిపింది. ఈ ఉద్యోగాల ఖాళీల్లో బెంగళూరు కంపెనీలు 23 శాతంతో అగ్రస్థానంలో ఉండగా, ఢిల్లీ 18 శాతంతో రెండో స్థానంలో ఉన్నది. హైదరాబాద్‌ 15 శాతంతో మూడో స్థానంలో ఉంటే, ముంబై 11 శాతం, పుణె 8 శాతంతో టాప్‌-5లో చివరి రెండు స్థానాల్లో ఉన్నాయి. ఇటు ఉద్యోగార్థులు, అటు సంస్థల విశ్వాసం ఉన్నందునే ఇంత ఆదరణను అందుకోగలుగుతున్నామని క్వెస్‌ కార్ప్‌ ప్రెసిడెంట్‌ శేఖర్‌ గరిస తెలిపారు.