‘వడ్డీ ఆదాయంపై పన్ను వద్దు’

ప్రభుత్వ రంగ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా (ఎస్బీఐ) చైర్మన్‌ దినేశ్‌ కుమార్‌ ఖారా.. వడ్డీ ఆదాయంపై పన్ను మినహాయింపుంటే బాగుంటుందన్న అభిప్రాయాన్ని వ్యక్తం చేశారు. ప్రస్తుతం డిపాజిట్లపై ఏటా పొందే వడ్డీ ఆదాయం రూ.40,000 దాటితే బ్యాంకులు ట్యాక్స్‌ డిడక్టెడ్‌ ఎట్‌ సోర్స్‌ (టీడీఎస్‌) కోతలకు దిగుతున్నాయి.

న్యూఢిల్లీ, జూన్‌ 22: ప్రభుత్వ రంగ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా (ఎస్బీఐ) చైర్మన్‌ దినేశ్‌ కుమార్‌ ఖారా.. వడ్డీ ఆదాయంపై పన్ను మినహాయింపుంటే బాగుంటుందన్న అభిప్రాయాన్ని వ్యక్తం చేశారు. ప్రస్తుతం డిపాజిట్లపై ఏటా పొందే వడ్డీ ఆదాయం రూ.40,000 దాటితే బ్యాంకులు ట్యాక్స్‌ డిడక్టెడ్‌ ఎట్‌ సోర్స్‌ (టీడీఎస్‌) కోతలకు దిగుతున్నాయి. సీనియర్‌ సిటిజన్లకు ఈ పరిమితి రూ.50,000గా ఉన్నది. ఇక సేవింగ్స్‌ అకౌంట్లలో వేసిన నగదు మొత్తాలపై వార్షిక వడ్డీ ఆదాయం రూ.10,000 మించితే పన్నులు వర్తిస్తున్నాయి. ఈ నేపథ్యంలో ఈ పన్నులను ఎత్తివేస్తే బ్యాంకులకు ఉపయోగకరంగా ఉంటుందని దినేశ్‌ ఖారా అన్నారు. పెరిగే సేవింగ్స్‌ను దీర్ఘకాలిక మౌలిక ప్రాజెక్టులకు ఫండింగ్‌ చేసుకోవచ్చని చెప్పారు. ఈ ఆర్థిక సంవత్సరానికి (2024-25)గాను పూర్తిస్థాయి బడ్జెట్‌ను వచ్చే నెల పార్లమెంట్‌లో కేంద్ర ఆర్థిక శాఖ మంత్రి నిర్మలా సీతారామన్‌ ప్రవేశపెట్టే అవకాశాలున్నాయి.